Bir aptada álem boıynsha koronavırýstan 11 myń adam qaıtys boldy - BUU

NUR-SULTAN. QazAqparat – Bir aptada búkil álem boıynsha koronavırýstan 11 myń adam qaıtys boldy, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııasynyń Telegram kanalyna silteme jasap.

Ondaǵy málimetterge qaraǵanda, Dúnıejúzilik densaýlyq saqtaý uıymynyń (DDU) apta saıynǵy epıdemıologııalyq bıýlleteninde koronavırýsty juqtyrý kórsetkishi ótken aptada ózgerissiz qalǵany, ólim 1% tómendegeni aıtylǵan.

11-17 shilde aralyǵynda Eýropa men Afrıkada koronavırýsty juqtyrý sáıkesinshe 16% jáne 27%-ke tómendedi. Shyǵys Jerorta teńizinde jańa jaǵdaılardyń sany ózgergen joq, qalǵan óńirlerde juqtyrý kóbeıdi, eń kóp juqtyrý Tynyq muhıtynyń batys bóligine (37%) tıesili.

Bir apta ishinde búkil álemde 6,2 mıllıonnan astam COVID-19-dy juqtyrýdyń jańa jaǵdaıy anyqtaldy.

Koronavırýstan qaıtys bolǵandar sany Amerıka aımaǵynda (7%), Shyǵys Jerorta teńizinde (15%) jáne Ońtústik-Shyǵys Azııada (20%) ósti. Bul rette ólim-jitim Tynyq muhıtynyń batys bóliginde (3% - ke), Eýropada (14% - ke) jáne Afrıkada (39% - ke) tómendedi.