Bir aptada 8 bala terezeden qulap ketti – TJM

ASTANA. QazAqparat – Ótken bir aptada el óńirlerinde 8 bala terezeden qulap ketti, dep habarlaıdy QazAqparat Tótenshe jaǵdaılar mınıstrligine silteme jasap.

Mınıstrlik málimetinshe, balalardyń bıiktikten qulaý jaǵdaılary ata-ananyń qadaǵalamaýynan bolady.

«Statıstıka kórsetkendeı, jyl saıyn kún jylyna bastaǵannan keıin balalardyń terezeden qulaýy sııaqty jazataıym oqıǵalardyń artýy baıqalady. Bul jaǵdaıda eń úlken qaýip – terezelerge ornatylǵan moskıt torlary.

Ótken aptada ǵana elimizde 8 jaǵdaı boldy, onyń ishinde Astana qalasynda 1 úsh jasar sábı 17-qabattan qulap, qaza boldy.

Terezeden qulaǵan kezde balalar uzaq merzimdi emdeý men qalpyna keltirýdi qajet etetin aýyr jaraqat alatynyn atap ótkimiz keledi. Al keıbir jaǵdaılarda bala múgedek bolyp qalady, kóbinese oqıǵa ornynda nemese aýrýhanaǵa barar jolda kóz jumady», - dep eskertti mınıstrlikten.

Jazataıym oqıǵalardyń aldyn alý joldary:

- bala terezeni óz betinshe ashýyna múmkindik bermeıtindeı buǵattaýyshtar ornatý;

- terezeniń janyna jıhaz qoımańyz;

- terezede tıisti qorǵaý quraldary ornatylmasa, moskıt torlaryn qoımańyz (bala moskıt toryna súıenip, qulap ketedi, ol balanyń salmaǵyna eseptelmegen);

- balany eresekterdiń qaraýynsyz, terezeleri ashyq jerde, sondaı-aq olardy ózderi asha alatyn jerde qaldyrmańyz;

- balalarǵa ashyq terezeniń qaýipti ekenin túsindirińiz, moskıt torǵa súıenýge bolmaıtynyn eskertińiz;

- balalar terezeniń janynda turyp, oǵan kóterilýge tyrysqanda, qaýip týraly únemi eske salý kerek.

Osy qarapaıym erejelerdi saqtaı otyryp, siz balańyzdyń ómirin saqtaısyz.