Bir aptada 40 myń adam jol erejesin buzdy – ІІM
NUR-SULTAN. QazAqparat – QR Іshki ister mınıstrligi ótken aptada júrgizilgen «Qaýipsiz jol» jedel aldyn alý sharasyn qorytyndylady, dep habarlaıdy QazAqparat tilshisi.
«Jol qozǵalysyn qadaǵalaý barysynda 40 577 tártip buzý faktisi, onyń ishinde 340 avtokólikti mas kúıinde basqarý, 3 564 – jyldamdyqty shamadan tys arttyrý, 126 – joldyń qarsy betine shyǵyp ketý, 836 – baǵdarshamnyń tyıym salý belgisine qaramaı ótip ketý boldy», - dedi QR Іshki ister mınıstrliginiń resmı ókili Nurdildá Oraz mınıstrlikte ótken onlaın brıfıngte.
239 júrgizýshi temir jol bóliginen ótý tártibin buzǵan, al jaıaý júrginshiler arasynda 5 921 ereje buzýshylyǵy anyqtaldy.
«Oǵan qosa, 701 qoǵamdyq kólik júrgizýshileriniń jol erejesin buzǵany anyqtaldy. Shara barysynda 2 864 shaqyrym jol qaýipti ýchaske anyqtaldy, 426 jol belgisi qoıyldy», - deıdi resmı ókil.
Aıta keteıik, 26 qarasha kúni QR Іshki ister mınıstrligi, aýmaqtyq organdar men ishki ister bólimsheleri jáne qylmystyq-atqarý júıesi departamentteri alǵash ret «ZOOM» platformasy arqyly azamattardy biryńǵaı qabyldaý kúnin ótkizedi.
