Bir aptada 317 qazaqstandyq óz qarýyn polıtsııaǵa tapsyrdy

ASTANA. QazAqparat – Ótken aptada el aýmaǵynda 399 qarý-jaraq polıtsııaǵa tapsyryldy. Aktsııa jalǵasyp jatyr. Bul týraly Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Mınıstrlik jyl saıyn ótkizetin zańsyz saqtalǵan atys qarýyn, oq-dárilerdi jáne jarylǵysh zattardy halyqtan satyp alý aktsııasy jalǵasýda. Ol 10 sáýirde bastaldy. Bul maqsatqa respýblıkalyq bıýdjetten 88 mln teńgeden astam qarjy bólindi. Bir apta ishinde ishki ister organdaryna 317 azamat júgindi, olar óz erkimen 399 atys qarýyn, 1,4 myńnan astam qarý tapsyrdy. Halyqtan qarý-jaraq satyp alý sharasy 2008 jyldan beri júrgizilip keledi. Osy ýaqyt ishinde azamattar jalpy somasy 1,9 mlrd teńgege 56 myńnan astam atys qarýy men 2 mln astam patrondy óz erkimen polıtsııaǵa tapsyrdy», - dedi Shuǵyla Turlybek mınıstrlikte ótken baspasóz máslıhatynda.

Onyń aıtýynsha, qabyldanǵan sharalar tıimdiligin kórsetip otyr. Onyń dáleli sońǵy 5 jylda qarý qoldaný arqyl jasalatyn qylmystar sany azaıǵan.

«Eske sala keteıik, qarý-jaraqty erikti túrde tapsyrǵany úshin respýblıkalyq bıýdjetten qarýdyń tehnıkalyq jaǵdaıyna baılanysty onyń árbir birligine 34 myńnan 345 myń teńgege deıingi somada tólem jasaý kózdeledi», - deıdi ol.

Qarý-jaraq, oq-dári jáne jarylǵysh zattardy qabyldaý ár aýmaqtyq polıtsııa mekemesinde júrgiziledi.

«Qaýipsizdikti qamtý maqsatynda vedomstvo tabylǵan jarylǵysh zattar jáne oq-dárilerge ózdiginen áreket jasamaýdy jáne olardy tasymaldaýǵa tyryspaýǵa shaqyrady. Ol úshin polıtsııaǵa 102 nómirine nemese 112 nómirine telefon arqyly habarlaǵan jón», - dep habarlaıdy ІІM-nen.