Bir aptada 12 adam sýǵa ketip mert boldy – TJM

NUR-SULTAN. QazAqparat – Jyl basynan beri Qazaqstanda 53 adam sýda mert boldy. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov aıtyp berdi, dep habarlaıdy QazAqparat tilshisi.

Spıkerdiń aıtýynsha, shomylý maýsymy 1 maýsymda resmı bastalady jáne 1 qyrkúıekke deıin sozylady.

«Ókinishke qaraı, sýǵa túsý maýsymy bastalmasa da, 53 adam qaza tapty, onyń ishinde 26 bala bar. Jyl basynan beri sý aıdyndarynan 38 adam, onyń ishinde 4 bala qutqaryldy. Ásirese balalardyń sýda mert bolýy jaǵdıy kóbeıgen. Byltyr osy kezeńde 18 bala mert bolsa, bıyl 26-ǵa jetti», - dedi Baýyrjan Syzdyqov Ortalyq kommýnıkatsııalar qyzmetinde ótken brıfıngide.

Bir ǵana ótken aptada 17-23 mamyr aralyǵynda sý aıdyndarynda 12 adam, onyń ishinde 2 bala sýǵa batyp kóz jumdy.

«Sýda qaza bolýdyń basty sebepteri: jabdyqtalmaǵan, tyıym salynǵan jerlerde shomylý (25 jaǵdaı), balalardy qaraýsyz qaldyrý (18 jaǵdaı), sý qoımasyna qulap ketý jáne óz kúshin durys baǵalamaý (16 jaǵdaı), jeke qutqarý quralynsyz balyq aýlaý (11 jaǵdaı), keýdeshesiz júzý quralyn (katamarandy) paıdalaný jáne mas kúıde sýǵa túsý», - dep túsindirdi komıtet tóraǵasy.

Aıta keteıik, elimizde shomylýǵa ruqsat berilgen 469 oryn bar, onyń ishinde 118 kommýnaldyq jáne 275 jeke jaǵajaı belgilengen. Shomylýǵa ruqsat etilgen jáne tyıym salynǵan oryndar 2GIS kartasynda kórsetiledi.

Shomylý maýsymy bastalmaı-aq ereje buzǵan 242 adam ákimshilik jaýapqa tartylyp úlgerdi.