Bir aptada 1 tonnadaı balyq zańsyz aýlanǵan

NUR-SULTAN. QazAqparat - El aýmaǵynda júrip jatqan «Bekire-2022» aktsııasynyń alǵashqy aptasynda zańsyz aınalymnan 911 kg balyq alyndy. Sondaı-aq, brokonerlik faktileri boıynsha 4 qylmystyq is qozǵaldy, dep habarlaıdy QazAqparat QR Ekologııa, geologııa jáne tabıǵı resýrstar mınıstrligine silteme jasap.

Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary quqyq qorǵaý, tabıǵat qorǵaý organdarynyń jáne QR UQK Shekara qyzmetiniń qyzmetkerlerimen birlesip, qoldanystaǵy zańnamany buzýdyń 101 deregin anyqtady, 80 adam ákimshilik jaýapkershilikke tartyldy.

Sonymen qatar, 4 is ákimshilik sot organdaryna joldandy. Zańsyz balyq aýlaý deregi boıynsha 4 qylmystyq is qozǵaldy. Tártip buzýshylarǵa 1,5 mln. teńge aıyppul salyndy.

Zańsyz aınalymnan 911 kg balyq jáne 33 aýlaý quraly, 33 sýda júzý quraly alyndy. Ózen arnasy men teńiz akvatorııasyn kúndelikti súzý jumystary nátıjesinde sý qoımalary 94 zańsyz balyq aýlaý quralynan tazartyldy.

Esterińizge sala keteıik, Qazaqstanda «Bekire-2022» balyq qorǵaý aktsııasy bastalǵan bolatyn. Shara 31 mamyrǵa deıin jalǵasady.