Bir altyn, bir kúmis: Qazaqstandyq gımnastardyń Azııa chempıonatyndaǵy nátıjesi
ASTANA. QazAqparat – Sıngapýrda sporttyq gımnastıkadan eresekter arasyndaǵy Azııa chempıonatynyń fınaldyq kezeńi aıaqtalyp, qazaqstandyqtar bir altyn, bir kúmis medal jeńip aldy, dep habarlaıdy QazAqparat QR gımnastıka federatsııasyna silteme jasap.
Atap aıtqanda, Narıman Qurbanov at snarıadyndaǵy saıysty 15.333 upaımen aıaqtap, altyn júldege ıe boldy. Kúmis jáne qola júlde sáıkesinshe Iordanııa jáne Japonııa sportshylaryna buıyrdy.
Erkin jattyǵýda qazaqstandyq Dmıtrıı Potanın 14,366 upaımen kúmis medal enshiledi. Birinshi orynnan fılıppındik sportshy, úshinshi orynnan Qytaı gımnasty kórindi. Osy dıstsıplınada Mılad Karımı de óner kórsetken bolatyn, ol jattyǵýdy 5-orynmen aıaqtady (14.100 upaı).
Buǵan deıin habarlaǵanymyzdaı, atalǵan Azııa chempıonatynda Qazaqstan erler quramasy komandalyq esepte qola júldege ıe boldy. Osylaısha, gımnasshylarymyz kúzde Belgııada ótetin əlem chempıonatyna joldama aldy. Qazaqstan áıelder quramasy komandalyq esepte 4-shi orynǵa jaıǵasty.
Aıta keteıik, birneshe kún buryn Sıngapýrda sporttyq gımnastıkadan jasóspirimder arasyndaǵy Azııa chempıonaty aıaqtalǵan bolatyn.
Nátıjesinde at snarıadynda (13.950 upaı) Zeınolla Ydrysov altyn júldege ıe boldy. Kúmis jáne qola júldege Qytaı men Japonııa sportshylary qol jetkizdi.
Tirep sekirý jattyǵýynda Altynhan Temirbek (13.650 upaı) úzdik úshtikten kórine aldy. Bul jattyǵýda birinshi orynda – Qytaı, ekinshi orynda – Fıllıpın.
Ydrysov Nurtan aspadaǵy jattyǵýda (12.500 upaı) japondyq jáne koreıalyq sportshyǵa ese jiberip, qola medal aldy.
Jalpy komandalyq esepte Qazaqstan quramasy 4-shi orynnan kórindi.
