Bir akýsher bir júkti áıelge kómektesýi kerek, bizde bes ne odan da kóbine qaraıdy - tujyrymdama

ASTANA. QazAqparat – Qazaqstandaǵy perzenthanalarda ota jasaıtyn akýsher-gınekolog mamandar tapshy. Mundaı másele Ashyq NQA portalynda jarııalanǵan ana men bala densaýlyǵyn saqtaý qyzmetin damytý jónindegi 2024-2030 jyldarǵa arnalǵan «Árbir áıel - árbir bala» tujyrymdamasynda kóterilgen, dep habarlaıdy QazAqparat tilshisi.

«Perzenthanalarda kadrlar tapshylyǵy, onyń ishinde ota jasaıtyn akýsher-gınekologterdiń jetispeýshiligi baıqalady. Júkti áıelderge medıtsınalyq kómek kórsetý kezinde komandalyq tásil jetkiliksiz qoldanylady. Bosaný kezinde áıelge sapaly jáne úzdiksiz kómek kórsetý úshin 1 akýsher - 1 júkti áıel araqatynasyn saqtaý qajet. Bizdiń elimizde bir akýsherge 5 nemese odan da kóp júkti áıelder keledi», - dep másele kóterilgen tujyrymdamada.

Buǵan qosa, bosaný kezinde náresteniń jaǵdaıyn qadaǵalap otyrýǵa múmkindik beretin zamanaýı apparattar jetipseıdi.

«Qupııalylyqty saqtaý - seriktestik bosanýdy tıimdi júzege asyrýǵa múmkindik bermeıdi. Nátıjesinde bosanýdyń tek 40%-y seriktestiń qatysýymen bolady. Sondaı-aq, bosaný kezindegi náresteniń jaǵdaıyn baqylaýǵa arnalǵan apparatýramen qamtamasyz etý deńgeıi tómen», - dep jazylǵan qujatta.