Bir aǵamyz áıelimdi urmaýǵa keńes bergen - Bas prokýror Asanov

ASTANA. QazAqparat - Búgin turmystyq zorlyq-zombylyq máselelerine arnalǵan jıynda QR Bas prokýrory Jaqyp Asanov óz baıandamasyn ómirinde bolǵan bir oqıǵamen bastady, dep xabarlaıdy QazAqparat tilshisi.

"Ol oqıǵa búgingi jıynnyń taqyrybymen uıqasyp otyr. 80-jyldardyń sońynda bir prokýror aǵamyz maǵan aqyl-keńesin bergen edi. "Jaqyp", - dedi ol. - Jaqyn arada men zeınetkerlikke shyǵamyn, saǵan úlken bir qateligim jaıynda aıtaıyn dep edim. Men áıelime de, kishkentaı balalaryma da qol jumsap, olardy uryp-soǵýmen óttim. Ondaı jaǵdaılar talaı ret bolǵan. Qazir onyń barlyǵy maǵan býmerangpen qaıtyp kelip otyr. Áıelim naýqas boldy. Ol áli kúnge deıin meniń qol jumsaǵanymdy keshire almaı keledi. Balalarymnyń qatynasy da sýyp ketken. Olar óz anasyn qatty aıaıdy. Sen áli jassyń. Saǵan aıtarym, áıelińe de, balalaryńa da eshqashan qol kóterýshi bolma. Meniń ómirim osymen bitti. Biraq sol qateligim úshin qatty ókinemin" dedi aǵamyz. Birshama ýaqyttan keıin ol kisi qaıtys boldy".

Onyń aıtýynsha, elimizde áıel adamdarǵa qatysty qylmystardyń sany 90 paıyzǵa ósti. Árbir úshinshi qylmys otbasy jaǵdaıynda boldy. Ótken jyly 36 áıel jáne bir bala qaıtys bolsa, 2 481 áıel men 851 bala zorlyq-zombylyqtyń qurbanyna aınaldy. 742 áıel men kámelettik jasqa tolmaǵan 175 jas óz-ózine qol saldy.

Aıta keteıik, Bas prokýror óz baıandamasyn tolyǵymen memlekettik tilde oqyp shyqty.