Bir adamǵa úsh ret qatarynan qastandyq jasaldy - Almaty oblysy
TALDYQORǴAN.QazAqparat - Almaty oblysynyń Eńbekshiqazaq aýdanyndaǵy Aşysaı aýylynyń turǵyndary polıtseılerdiń nemquraılyǵyna narazy. Aýyl turǵyna úsh ret qatarynan qastandyq jasalǵan. Alaıda úsh oqıǵa barysynda da qylmyskerler qolǵa túspegen, dep habarlaıdy QazAqparat tilshisi.
Bul joly kásipkerdiń kóligine jarylǵysh zat qoıyp ketken. Nurlan Tasbolatuly tańerteń otbasymen birge sháıin iship bolǵannan keıin, óziniń kómekshisine kóligin otaldyra salýyn suraǵan. Kómekshisi kóliktiń kelip esigin ashpaqshy bolǵan kezde dóńgelektiń astynda shıratylyp jatqan jipti kórgen. Jipti alyp tastamaqshy bolyp tartyp qalǵanda jarylys bolǵan. Jarylystyń qatty bolǵany sonshalyq Nurjigit esimdi azamat 5-6 metrge ushyp ketken. Nurlannyń anasy kóliktiń astyndaǵy ekinshi jarylǵysh iske qosylmaı qalǵanyna shúkir deıdi. Aıtýlarynsha saperler saǵattap júrip taǵy bir jarylǵysh zatty zalalsyzdandyrypty. Al aýyr halde aýrýhanaǵa jetkizilgen Nurjigit qazir Esik qalasynyń ortalyq aýrýhanasynda em alyp jatyr. Bir adamǵa úsh ret qatarynan qastandyq jasalýyn aýyl azamattary polıtsııanyń nemquraılyǵynan kórip otyr. Alǵashqy eki oqıǵa kezinde kúdiktiler ustalǵanda aıdyń kúnniń amanynda aýylda mundaı jarylys bolmas edi deıdi olar.
«Pıstoletpen kelip atyp jatyr, avtomatpen kelip atyp jatyr. Jarylǵysh zat qoıyp jatyr. Endi bir kúni tankimen kelip taptap ketkenshe jatatyn shyǵarmyz osynda. Qashan kelip óltirip ketedi eken dep», - deıdi Aşysaı aýylynyń turǵyny Nurlan Ahmetov.
Esterińizge sala keteıik, Almaty oblysynda kásipkerdiń kóligin belgisiz bireýlerdiń jaryp jibergeni jaıly habarlaǵan bolatynbyz.
Oblystyq ІІD baspasóz qyzmetiniń málimetinshe, osy faktige baılanysty «Adam óltirýge oqtalý» babyna sáıkes qylmystyq is qozǵalyp, tergeý amaldary jalǵasýda. Al kásipkerdiń ózi zardap shekpegen. Kólikke jarylǵysh zat qoıǵan adam izdestirilip jatyr.
