Bir adamǵa táýligine 140 lıtrge deıin sý memleket esebinen sýbsıdııalanady
«Sý kodeksine sáıkes, memleket asa mańyzdy toptyq jáne jergilikti sýmen jabdyqtaý júıelerinen aýyz sý berý qyzmetteriniń qunyn ishinara sýbsıdııalaıdy. Demek, jergilikti atqarýshy organdar óńirdiń áleýmettik-ekonomıkalyq damýyna jáne tarıfterge baılanysty 1 tekshe metr aýyz sý úshin tólem mólsherin jáne tarıf pen tólem mólsheri arasyndaǵy aıyrmashylyqty memleket esebinen sýbsıdııalaıdy», - dedi QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly Ortalyq kommýnıkatsııalar qyzmetinde.
Bul rette, sý resýrstaryna uqypty qaraý maqsatynda aýyz sýdy esepke alý aspaby bolǵan kezde bir adamǵa táýligine 140 lıtrge deıin sýbsıdııalaý boıynsha normatıvtik shekteý belgilendi.
Osy normadan asyp ketken jaǵdaıda halyq sýmen jabdyqtaý qyzmetterine tolyq tarıf boıynsha aqy tóleıdi.
Buǵan deıin spıker elde sý tutyný mádenıeti qalyptaspaǵanyn, Qazaqstan Eýropa elderimen salystyrǵanda 3 ese kóp sý jumsaıtynyn aıtqan edi.