«Bıpek-Avto» isi boıynsha sot úkimi shyqty

ÓSKEMEN. KAZINFORM – Óskemen qalalyq soty «Bıpek-Avto – Azııa Avto» kompanııalar tobynyń burynǵy 8 basshysyna qatysty úkim shyǵardy.

Aıyptalýshylarǵa qatysty is alaıaqtyq, salyq tóleýden jaltarý jáne aqshany jylystatý baptary boıynsha qaraldy. Úsh sottalýshy - Elena Kýzmına, Igor Potapov jáne Erjan Mandıev alaıaqtyq baby boıynsha aqtaldy. Alaıda Mandıev jekemenshik ıesine múliktik zııan keltirgeni úshin kináli dep tanylyp, eki jyl segiz aıǵa bas bostandyǵynan aıyryldy. Alaıaqtyq pen salyq zańyn buzdy dep aıyptalǵan Galına Mokına tolyqtaı aqtalyp shyqty.

Qalǵan aıyptalýshylar - Aleksandr Tolstıakov, Andreı Rıabets, Konstantın Lobanov jáne Dmıtrıı Borzyh 2 jarym jyldan 2 jyl 8 aıǵa deıin bas bostandyǵynan aıyryldy. Sot barlyq sottalýshyny 2021 jyldan bastap tergeý ızolıatorynda jáne úıqamaqta bolǵan ýaqytyn eseptep, túrmeden bosatty.

Aıta keteıik, avtokólikterdi qurastyrý jáne satýmen aınalysqan «Bıpek-Avto – Azııa Avto» kompanııasy Qazaqstan naryǵynda 1992 jyldan beri jumys istep keldi. 2020 jyly el bıligi Óskemende tolyq tsıkldi zaýyt salý boıynsha mindettemelerdiń oryndalmaýyna baılanysty holdıngpen kelisimshartty buzdy. Sot sheshimimen kompanııa memleketke 174 mlrd teńgeni qaıtarýǵa mindetteldi.

Eske salsaq, buǵan deıin ShQO-da «BIPEK AVTO» kompanııasynan tárkilengen shıpajaı aýktsıonda satylǵany habarlanǵan.