«Bıpek Avto» kompanııalar tobynan memleketke 11,6 mlrd teńgeniń múlki tárkilendi

ÓSKEMEN. KAZINFORM – Shyǵys Qazaqstan oblysyndaǵy «Bıpek Avto – Azııa Avto» kompanııalar tobynan memleket menshigine 11,6 mlrd teńgeniń múlki tárkilendi. 

Bul týraly ShQO boıynsha ekonomıkalyq tergep-tekserý departamenti basshysynyń orynbasary Tımýr Muqanov Óńirlik kommýnıkatsııalar qyzmetinde ótken brıfıng barysynda málim etti.

– Jyl basynan beri departament óndirisinde 17 qylmystyq is tergelgen. Sonyń ishindegi eń irilerdiń biri – «Bıpek Avto – Azııa Avto» kompanııalar tobyna qatysty is boldy. Tergeý nátıjesinde memleket kirisine jalpy quny 11,6 mlrd teńgeden asatyn múlik tárkilendi. Onyń ishinde avtokólikter, jyljymaıtyn múlikter, áýe kemeleri jáne demalys bazasy bar, - dedi ol. 

Sondaı-aq kezinde D. Serikbaev atyndaǵy ShQTÝ-ǵa tıesili bolǵan, alaıda zańsyz ıelikten shyǵarylyp «Altaı ShQAT» JShS-ǵa berilip ketken ǵımarat memleket menshigine qaıtaryldy. 

– Atalǵan nysannyń quny shamamen 1,5 mlrd teńgeni quraıdy. Tergeý organdary jumysynyń arqasynda óńirdiń strategııalyq mańyzy bar bilim nysany memleket baqylaýyna qaıta ótti, - dedi Tımýr Muqanov. 

Budan bólek, Ulan aýdanynyń Shybyndy jáne Samar aýdanynyń Qulynjon ózenderiniń ańǵarlarynda baǵaly metaldardy zańsyz óndirýdiń eki faktisi tirkelgen. Memleketke keltirilgen zalal 400 mln teńgeden asty. Tergeý barysynda 6 keliden astam altyn, 56 myń AQSh dollary jáne ken óndirýge arnalǵan tehnıka tárkilendi.

Zańsyz óndiristi uıymdastyrǵan tulǵalar qamaýǵa alynyp, qylmystyq is sotqa joldandy.

Eske salsaq, ShQO-da «BIPEK AVTO» kompanııasynan tárkilengen shıpajaı byltyr aýktsıonda satylǵan bolatyn.