«BIPEK AVTO – AZIıA AVTO» kompanııasy basshylarynyń biri Chehııada ustaldy – ІІM

ASTANA. QazAqparat – Chehııa astanasy Pragada halyqaralyq izdeýde júrgen «BIPEK AVTO – AZIıA AVTO» kompanııalar toby basshylarynyń biri ustaldy. Bul týraly QR Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Ótken aptada jedel-izdestirý is-sharasy barysynda Іshki ister mınıstrligi Interpol ulttyq ortalyq bıýrosynyń qyzmetkerleri sheteldik áriptesterimen birlesip shet memleketter aýmaǵynda halyqaralyq izdeý jarııalanǵan birqatar qylmyskerdi ustady», - dedi Shuǵyla Turlybek mınıstrlikte ótken baspasóz máslıhatynda.

ІІM ókiliniń aıtýynsha, qazir barlyq fıgýranttar qamaýda, olardy Qazaqstanǵa ekstradıtsııalaý máselesi sheshilip jatyr. Sondaı-aq ustalǵandar arasynda «BIPEK avto - Azııa avto» kompanııasy basshylarynyń biri bar.

«Chehııa astanasy Pragada Qazaqstan ІІM Interpol ulttyq ortalyq bıýrosynyń suraýy boıynsha asa iri mólsherde alaıaqtyq jasaǵany úshin ShQO Ekonomıkalyq qylmystar departamenti izdeý salǵan «BIPEK AVTO – AZIıA AVTO» kompanııalar toby basshylarynyń biri ustaldy.

Odan bólek, Ispanııada transulttyq qylmystyq uıymnyń quramynda «Questra holdings», «Questra World», «Atlantic Global Asset» JShS qarjy pıramıdasyn qurǵany jáne oǵan basshylyq jasaǵany úshin Astana polıtsııa departamenti izdeý jarııalaǵan Reseı Federatsııasynyń 35 jastaǵy azamaty ustaldy», - dedi ol.