Bıootyn óndirisi jáne aınalymyn memlekettik retteý týraly zań jobasy úshinshi oqylymǵa qaldyryldy - Májilis
A. Aqpannyń 3-i. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda «Bıootyn óndirisi jáne aınalymyn memlekettik retteý týraly» zań jobasy ekinshi oqylymda talqylandy.
Birqatar kelispeýshilikter týyndaǵandyqtan, qujatty pysyqtaı túsýi úshin joba Bas komıtetke jiberildi, dep habarlaıdy QazAqparat.
Atalǵan zań jobasyn qabyldaý, bıootyn óndirisi jáne aınalymy kezinde týyndaıtyn qoǵamdyq qatynastardy retteýdi qamtamasyz etýge jáne quqyqtyq, ekonomıkalyq, uıymdastyrý jaǵdaılaryn aıqyndaýǵa múmkindik beredi. Sonymen birge, qujattyń maqsaty elimizdiń bıootyn óndirisin damytý, ony óndirý kezinde memlekettiń azyq-túlik qaýipsizdigin qamtamasyz etý, sondaı-aq qorshaǵan ortany qorǵaý bolyp tabylady. Aıta ketý kerek, qujatta Ákimshilik quqyq buzýshylyq týraly kodekske ákimshilik jaza sharalaryn qoldaný jáne bıootyn óndirisi jónindegi áreketti toqtatý bóligine, «Etıl spırti men alkogol óniminiń óndirilýin jáne aınalymyn memlekettik retteý týraly» zańǵa, osy zańnyń bıootynǵa áreketiniń ara-jigin ajyratý bóligine ózgerister engiziledi. Sonymen qatar «Munaı ónimderiniń jekelegen túrlerin óndirý jáne olardyń aınalymyn memlekettik retteý týraly» Qazaqstan zańyna bıootyn men munaı ónimderin óndirýshilerge munaı ónimderin bıootynmen kompaýndırleý jónindegi qyzmetpen aınalysýǵa quqyq berý bóligine túzetý engizilip otyr.
Májilis depýtattary jobany ekinshi oqylymǵa ázirleý barysynda birqatar usynystar engizgen bolatyn. Bundaı usynystardyń negizgi bóligi bıootyn óndirisi kezinde tamaq shıkizatyn paıdalaný úshin kvota belgileýge, sondaı-aq 3-synypty bıdaıdy bıootyn óndirisine paıdalanýǵa tyıym salýdy belgileýge qatysty normalardy saqtaý qajettigine baılanysty bolyp tabylady. Dál osy máseleler de jalpy otyrysta talqylaý barysynda úlken pikirtalasqa aınaldy.
Osyǵan oraı, zań jobasy ekinshi oqylymda maquldanyp, áli de pysyqtaı túsý úshin úshinshi oqylymǵa ázirleý týraly sheshim qabyldandy.
