Bıootyn óndirisi men aınalymyn memlekettik retteýge arnalǵan zań jobasy kelisim komıssııasynda talqylanady
A. Maýsymnyń 16-sy. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Bıootyn óndirisin jáne aınalymyn memlekettik retteý týraly» zań jobasyna,
sondaı-aq «QR keıbir zańnamalyq aktilerine bıootyn óndirisin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgeristerdi talqylady. Onyń nátıjesi boıynsha kelispeýshilikterdi eńserý jónindegi kelisim komıssııasyn qurý týraly sheshim qabyldandy.
Atalmysh qujat bıootyn óndirisi kezinde memlekettiń azyq-túlik qaýipsizdigin qamtamasyz etýge, atmosferaǵa lastaýshy zattardyń shyǵarylý deńgeıin azaıtý jolymen qorshaǵan ortany qorǵaýǵa baǵyttalǵan. Sonymen qatar zań jobasy bıootyn óndirisin damytý salasynda ǵylymı zertteýler júrgizýdi qoldaýǵa jáne bıootyn óndirisi salasyna jańa tehnologııalar engizýdi kózdeıdi. Buǵan qosa zań jobasy Úkimetke bıootyn óndirisi boıynsha óndiristik qýattardyń shekti kólemin aıqyndaýǵa múmkindik beretin normalardy engizedi. Qujat qabyldanǵan jaǵdaıda ol áleýmettik jáne ekonomıkalyq salaǵa keri áserin tıgizbeıdi jáne bıootyn óndirisi kezinde týyndaıtyn qoǵamdyq qatynastardy rettep, otyn resýrstarynyń ekologııalyq taza kózderin utymdy paıdalaný úshin qajetti quqyqtyq, ekonomıkalyq, uıymdastyrýshylyq jaǵdaılar jasaıdy.
Aıta ketý kerek, ekinshi zań jobasynda Ákimshilik quqyq buzýshylyq týraly kodekske ákimshilik jaza sharalaryn qoldaný jáne bıootyn óndirisi jónindegi áreketti toqtatý bóligine, «Etıl spırti men alkogol óniminiń óndirilýin jáne aınalymyn memlekettik retteý týraly» zańǵa, osy zańnyń bıootynǵa áreketiniń ara-jigin ajyratý bóligine ózgerister engiziledi. Sonymen qatar, «Munaı ónimderiniń jekelegen túrlerin óndirý jáne olardyń aınalymyn memlekettik retteý týraly» qoldanystaǵy zańǵa bıootyn men munaı ónimderin óndirýshilerge munaı ónimderin bıootynmen kompaýndırleý jónindegi qyzmetpen aınalysýǵa quqyq berý bóligine túzetý engizilip otyr.
Senatorlar Májilis maquldaǵan zań jobasyna ózgerister engizip, qujatty qaıtarǵan bolatyn. Al Májilis depýtattary joǵary palata usynǵan túzetýlerdi qarap shyǵyp, birqatar pozıtsııa boıynsha óz ustanymdarynda qalatyn boldy. Sondyqtan da, kelispeýshilikterdi eńserý jónindegi kelisim komıssııasyn qurý týraly sheshim qabyldanyp, onyń quramyna palata depýtattary saılandy.
