BioNTech-tiń negizin qalaýshylar jańa kompanııaǵa aýysatynyn málimdedi
ASTANA. KAZINFORM — Batysta tirkeýden ótkenn alǵashqy COVID-19 vaktsınasyn jasaǵan ǵalymdar Ýgýr Shahın men Ozlem Tıýredjı endi sol vaktsınany jasaý úshin paıdalanylǵan mRNQ zertteýlerine oralýdy kózdep otyr, dep habarlaıdy DW.
Nemis vaktsına óndirýshisi BioNTech kompanııasynyń negizin qalaýshylar Ýgýr Shahın men Ozlem Tıýredjı kompanııadaǵy basshylyq qyzmetterinen ketetinin jarııalady. BioNTech/Pfizer vaktsınasyn jasaýmen tanymal ımmýnolog jup mRNQ zertteýlerine oralýdy kózdep otyr jáne bul úshin jańa kompanııa quryp jatyr.
Shahın juptyń «qaıtadan ónertapqysh bolýǵa» degen umtylysy jańa kompanııanyń paıda bolýyna túrtki bolǵanyn aıtty. Jańa kompanııa qaterli isikpen kúresýdiń áleýetti joly retinde qarastyrylatyn mRNQ zertteýlerine nazar aýdarady.
– Biz BioNTech kompanııasynyń klınıkalyq damýdyń sońǵy satysyna baǵyttalǵan nazary maǵan da, Ozlem Tıýredjıge de erte satydaǵy zertteýlerge nazar aýdarýǵa jetkilikti ýaqyt qaldyrmaǵanyn túsindik, — Shahın. — Bizde úlken áleýet bar, ony BioNTech ishinde de, jańa kompanııa ishinde de parallel túrde ashýǵa nıettenip otyrmyz.
Shahın men Tıýredjı jyldyń sońyna deıin BioNTech kompanııasynda qalady, biraq sonymen birge ózderiniń úshinshi kompanııasyn qurady. BioNTech azshylyq úlesine aıyrbas retinde jańa kompanııaǵa belgili bir patenttik quqyqtardy beredi.
– Biz olardyń jańa kompanııasymen aralas terapııanyń áleýetti tásilderi boıynsha yntymaqtastyq ornatýdy asyǵa kútemiz, - dedi BioNTech kompanııasy dırektorlar keńesiniń tóraǵasy Helmýt Ieggl.
Shahın BioNTech kompanııasynyń bas dırektory qyzmetin, al Tıýredjı kompanııanyń bas medıtsınalyq qyzmetkeri qyzmetin atqardy. Olardyń kompanııadan ketýdi josparlap otyrǵany jáne BioNTech kompanııasynyń kirisi 2026 jyly tómendeıtini týraly jańalyqtardan keıin farmatsevtıkalyq kompanııanyń aktsııalary shamamen 17%-ǵa tómendedi.
Maınts ımmýnolog juby 2020 jyly, COVID-19 pandemııasy kezinde búkil álemge tanymal boldy. Batys elderinde vırýspen kúresý úshin BioNTech ázirlegen vaktsına alǵashqy bolyp tirkeýden ótti.
Vaktsına álemdegi eń iri bes farmatsevtıkalyq alyptyń biri — amerıkalyq Pfizer korporatsııasymen birlesip jasaldy. Buryn habarlanǵandaı, BioNTech formýlany usyndy, al amerıkalyqtar vaktsına synaqtarynyń úshinshi kezeńin uıymdastyrdy. Ony tirkeýge kómektesti jáne óndiristik qýattylyqty qamtamasyz etti.
Sodan beri BioNTech kompanııasynyń taza paıdasy tek 2021 jyldyń alǵashqy toǵyz aıynda 7,1 mıllıard eýroǵa jetti. Kompanııa ornalasqan Maınts qalasy 1980 jyldardan beri jınaqtalǵan qaryzdarynyń bir bóligin salyq túsimderi arqyly óteı aldy. Germanııanyń eń baı adamdary arasyndaǵy óz oryndaryn nyǵaıtýmen qatar, jup Germanııanyń eń joǵary azamattyq nagradasy — Qurmet ordenin qosa alǵanda, kóptegen marapattarǵa ıe boldy.
Eske sala keteıik, balalarǵa arnalǵan Pfizer/BioNTech vaktsınasy tıimdiligin kórsetti.