Bıologtar jyrtqysh qustar tyrnaqtarynyń maqsatyn anyqtady
ASTANA. Jeltoqsannyń 2-si. QazAqparat - Bıologtar jyrtqysh qustardyń óz tyrnaqtaryn qalaısha paıdalanatynyn anyqtady,
dep habarlaıdy QazAqparat Lenta.rý saıtyna silteme jasap.
Qazirgi ýaqytqa deıin tyrnaqtardyń jumys isteý tetikteri nashar zerttelip kelgen bolatyn.
Zertteý aıasynda bıologtar qustardyń 24 túriniń tyrnaqtaryna salystyrmaly saraptama júrgizdi. Bul úshin olar jyrtqyshtardyń óz qurbandaryna shabýyl jasaǵan 170-ten astam beıne-jazbany paıdalandy.
Nátıjesinde olar, mysaly, qyrandardyń birinshi jáne ekinshi saýsaqtaryndaǵy eki úlken tyrnaqtardy anyqtady. Bul tyrnaqtar jyrtqyshqa qurbany jantalasyp bosanýǵa áreket etip jatqanda, ony tyrp etkizbeı ustap turýǵa múmkindik beredi: másele, bul qustardyń óz jemtigin jany shyqpaı jatyp-aq julmalap jeı bastaıtynynda bolyp otyr.
Úkilerdiń tyrnaqtary birshama qysqa jáne olardyń biri artqa qaraı qaıyrylǵan bolyp keledi. Qustar jemtigin syǵymdaý jáne óltirý úshin qarama-qarsy eki tyrnaǵyn paıdalanady. Qarshyǵalardyń da tyrnaqtary mólsher jaǵynan erekshelenedi - bul qustar qurbandaryn tumsyqtarymen jerge soqqylap uryp alǵandy qalaıdy.
Ǵalymdardyń aıtýynsha, jańa zertteýler qustardy zertteýmen aınalysatyn ǵalymdar úshin ǵana emes, ózgelerge de paıdaly bolmaq. Jańa zertteýler jaqyn týystary qustar bolyp keletin dınozavrlardyń qurylystaryn zertteýmen aınalysatyn paleontologtarǵa da ábden jarap qalýy ǵajap emes.
