Bıologııalyq qaýipsizdik týraly qujat ınfektsııalardyń taraýynyń aldyn alady – Májilis tóraǵasy
«Elimizdiń zańnamalyq tarıhynda alǵash ret «Bıologııalyq qaýipsizdik» týraly zań jobasyn (birinshi oqylymda) maquldadyq. Bul joba Memleket basshysy Qasym-Jomart Toqaevtyń tapsyrmasymen ázirlengen. Osy qujat elimizde bıoqaýipsizdikti qamtamasyz etýge arnalǵan. Ol ártúrli ınfektsııalardyń aldyn alýǵa, halyqtyń densaýlyǵyn saqtaýǵa, jalpy alǵanda, qorshaǵan ortany bıologııalyq qaýipterden qorǵaýǵa múmkindik beredi, - dedi Nurlan Nyǵmatýlın Májilistiń jalpy otyrysynda.
Qujat bıologııalyq qaýipsizdik salasyndaǵy memlekettik saıasatty iske asyrýdyń biryńǵaı júıesin qalyptastyrýǵa, memlekettik organdardyń ókilettikterin naqty ajyratýǵa jáne olardyń qyzmetin úılestirýge múmkindik beredi.
Palata spıkeri bul zań jobasy Qazaqstanda bıologııalyq qaýipsizdikti qamtamasyz etýdiń jańa modelin qurý úshin quqyqtyq negiz bolady jáne azamattar men qorshaǵan ortany qorǵaýǵa baǵyttalǵanyn aıtty.
Aıta keteıik, búgin Májiliste «Qazaqstan Respýblıkasynyń bıologııalyq qaýipsizdigi týraly» zań jobasy birinshi oqylymda maquldandy.
Zań jobasyn Densaýlyq saqtaý mınıstrligi Memleket basshysynyń 2020 jylǵy 27 mamyrda Ulttyq qoǵamdyq senim keńesiniń otyrysynda jáne 2020 jylǵy 16 qarashada koronavırýstyq ınfektsııa jónindegi keńeste bergen tapsyrmalaryn oryndaý maqsatynda múddeli memlekettik organdarmen birlese otyryp ázirledi. «Zań jobasynyń basty tujyrymdamasy bıologııalyq qaýip-qaterlerdi erte anyqtaý, olardy boldyrmaý jáne aldyn alý bolyp otyr.
