Bıologııalyq belsendi qospalar adam aǵzasyna qalaı áser etedi

ALMATY. QazAqparat - Qazirgi ýaqytta adamdar ártúrli dárýmender retinde bıologııalyq belsendi qospalardy (BBQ) qabyldap jatady. Degenmen, olardan qalaǵan nátıje ala almaı, kóńil tomaýshylyqtary da kezdesedi. Osyǵan oraı, Almaty qalasynyń sanıtarııalyq-epıdemıologııalyq baqylaý departamenti BBQ-ny qabyldaý, onyń paıdasy men zııany týraly málimet berdi, dep habarlaıdy QazAqparat tilshisi.

Departamentte málim etkendeı, bıologııalyq qospalarǵa: mýltıvıtamınder, mıneraldy keshender, ehınatseıa syǵyndysy, omega 3, hondoprotektorlar jáne ımmýnomodýlıatorlar kiredi.

«Dárihanalarda ártúrli túrdegi bıoqospalardy: dáriler, kapsýlalar, untaqtar, tunbalar, balzamdar, sıroptar, gelderdi usynady. Tabıǵı nemese tabıǵı uqsas zattardy az kólemde (BBQ) ishýge, tamaqqa, kremderge, balzamdarǵa jáne t.b. qosýǵa bolady. BBQ quramyna ósimdikter, shópter, mıneraldar, taǵamdyq talshyqtar, ara ónimderi, teńiz ónimderi, baldyrlar, probıotıkter, ashytqylar jáne basqa da zattar kirýi múmkin. Biraq, dárini olarmen aýystyrýǵa, sondaı-aq, aýrýdy óz betinshe emdeýge bolmaıdy.

Bıologııalyq belsendi qospalar birqatar mańyzdy faktorlarǵa baılanysty birneshe klastarǵa bólinedi. Negizgi úsh top: eýbıotıkter, nýtrıtsevtıkter jáne parafarmatsevtıkter dep atalady. Olar belgili bir komponentterdiń quramy men paıyzdyq quramy boıynsha bólinedi. Kóptegen bıologııalyq belsendi qosylystar, mysaly, flavonoıd klasy sııaqty, organızm ártúrli ósimdikterden alady», - dep málim etti departamentte.

Sondaı-aq, árbir tamaq qabyldaý kezinde qosymsha retinde BBQ paıdalanýǵa bolady. Degenmen, onda da abaı bolý qajet.

«Mysaly mýltıvıtamınderdi alaıyq. Olardyń quramynda 10-nan artyq komponentter bolýy múmkin. Olardyń barlyǵy sizge qajet pe? Aldyn alý úshin mundaı vıtamınderdi qabyldaýǵa bolmaıdy, sebebi mýltıvıtamınderdi baqylaýsyz qabyldaýdyń zııany týraly birqatar zertteýler bar»,- dedi departamentte.

Eger siz BBQ qabyldasańyz, onda onyń mólsherin saqtaý qajettigin este ustańyz.

«Beta-karotınniń shamadan tys mólsheri temeki shegýshilerde ókpe obyrynyń damý qaýpin arttyrady. Al kaltsıı men D vıtamınin kóp tutyný búırekte tastardyń paıda bolý qaýpin arttyrady. BBQ paıdalana otyryp, olardyń dári-dármek emes ekenin jáne arnaıy sertıfıkattaýdy talap etpeıtinin bilińiz, dári-dármek retinde arnaıy synaqtan ótpedi, biraq olardy dárihanalarda satyp alýǵa bolady.

Jalpy bıologııalyq belsendi qospalar adamdy emdemeıdi, olar aýrýlardyń aldyn alý quraly bolyp tabylady. Olar adam aǵzasyn tamaq arqyly alatyn paıdaly zattar men mıneraldardyń jetispeýshiligin óteýge bolady. Ásirese, júıke jáne dene júktemeleriniń joǵarylaýy kezinde, sondaı-aq, adam aýrýdan keıin qalpyna kelgende óte mańyzdy. Sondaı-aq, jarnamalanatyn bıoqosymshalardy qabyldaý aldynda mindetti túrde emdeýshi dárigerge baryńyz.

Esińizde bolsyn, keıbir qospalar dárilik dári-dármektermen ózara árekettesedi, bul aǵzaǵa jaǵymsyz jáne qaýipti saldary bolýy múmkin. Al dári-dármekterdi basqa dáriger sizge qabyldaýǵa jazyp berse, onda oǵan qandaı qospalardy qabyldaıtynyńyzdy aıtýdy umytpańyz. Qospalardy saýatsyz, zańsyz qoldaný qaıǵyly jáne jaǵymsyz saldarǵa ákelýi múmkin», - dep eskertti departamentte.