Bıologııalyq belsendi qospalardyń aınalymyn baqylaý kúsheıtildi
ASTANA. KAZINFORM — Densaýlyq saqtaý mınıstrligi el aýmaǵyndaǵy aınalymdaǵy bıologııalyq belsendi qospalardyń (BBQ) sapasy men qaýipsizdigine baqylaýdy kúsheıtti.
Qoldanystaǵy zańnamaǵa sáıkes Qazaqstanda BBQ-ny satýǵa ónimniń Keden odaǵynyń tehnıkalyq reglamentteriniń talaptaryna sáıkestigin rastaıtyn memlekettik tirkeýden ótkennen keıin jáne Eýrazııalyq ekonomıkalyq odaq kýálikteriniń biryńǵaı tizilimine engizilgennen keıin ǵana jol beriledi.
Tirkeý rásimin DSM Sanıtarııalyq-epıdemıologııalyq baqylaý komıteti Qazaq taǵamtaný akademııasynyń jáne EAEO elderiniń basqa da ǵylymı-zertteý ınstıtýttarynyń saraptamalyq qorytyndylarynyń negizinde júzege asyrady.
Satýǵa ruqsat bermes buryn barlyq BBQ-lar mynalarǵa sáıkestikke mindetti zerthanalyq zertteýlerden ótedi:
* mıkrobıologııalyq, toksıkologııalyq jáne fızıka-hımııalyq kórsetilimder;
* dárýmender men bıoaktıvti zattardyń belgilengen normalary;
* tyıym salynǵan komponentterdiń — ýly ósimdikterdiń, janýarlardan alynatyn óńdelgen ónimderdiń, patogendik mıkroorganızmder men sańyraýqulaqtardyń bolmaýy jónindegi talaptar.
Jańa baqylaý sharalary: 2024 jyldan bastap elimizde aqparattyń durystyǵy men memlekettik tirkeýdiń bolýy turǵysynan BAQ pen áleýmettik jelilerdegi BBQ jarnamasyna monıtorıng engizildi.
2025 jyldan bastap BBQ-ny sáıkestendirý quraldarymen tańbalaý boıynsha pılottyq joba iske asyrylýda, ol mynalardy qamtamasyz etedi:
* búkil jetkizý tizbeginiń ashyqtyǵy,
* ónimniń sońǵy tutynýshyǵa deıin baqylanýy,
* halyqtyń senimin arttyrý.
BBQ-lardy satýǵa tyıym salynady, eger:
* memlekettik tirkeý joq,
* jaramdylyq merzimi aıaqtalǵan,
* saqtaý sharttary buzylǵan,
* qaptamada quramy, qarsy kórsetilimderi jáne óndirýshisi týraly mindetti aqparat joq bolsa.
Qazaqstan Densaýlyq saqtaý mınıstrligi tutynýshylardyń nazaryn aýdarady: bıologııalyq belsendi qospalardy qoldanar aldynda dárigermen keńesý kerek.
BBQ-lardy baqylaýsyz qabyldaý, ásirese sozylmaly aýrýlary bar adamdarda, júkti áıelder men balalarda asqynýlarǵa ákelýi múmkin.
BBQ-lardy satyp alǵanda, mindetti túrde mynalardy tekserińiz:
* Qazaqstanda tirkeý kýáliginiń bolýy;
* ónimniń tolyq quramy («tabıǵı komponentter» sııaqty túsiniksiz tujyrymdarsyz);
* óndirýshi jáne óndiretin el;
* jaramdylyq merzimi jáne saqtaý sharttary;
* durys jáne tolyq tańbalaý (qoldaný tásili, qarsy kórsetilimder, saqtyq sharalary).
Densaýlyq saqtaý mınıstrligi azamattardyń densaýlyǵyn saqtaý maqsatynda bıologııalyq belsendi qospalar aınalymy salasyndaǵy ashyqtyq pen qaýipsizdikti qamtamasyz etý jónindegi jumysty jalǵastyrady.
Aıta ketelik 1 qyrkúıekten bastap mektep oqýshylary jańa standart boıynsha tamaqtanady.