Bıologııalyq belsendi qospalardy satyp alarda onyń zańdy ekenin qalaı tekserýge bolady
ASTANA. KAZINFORM — 2026 jylǵy 1 qyrkúıekten bastap Qazaqstanda bıologııalyq belsendi qospalardy mindetti tańbalaý engiziledi. Jańa júıe BBQ-nyń óndirýshiden nemese ımporttaýshydan bastap sońǵy satyp alýshyǵa deıingi aınalymyn baqylaýǵa múmkindik beredi. Bul týraly Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti Kazinform agenttiginiń resmı saýalyna bergen jaýabynda málim etti.
Komıtet tóraǵasynyń orynbasary Nurlan Sádýaqasovtiń málimetinshe, mindetti tańbalaý 2026 jylǵy 1 qyrkúıekten keıin óndirilgen jáne qoldanystaǵy memlekettik tirkeý týraly kýáligi bar BBQ-ǵa qatysty bolady.
— Ónimniń árbir danasyna Data Matrix biregeı tsıfrlyq kody beriledi. Ol taýardyń óndirýshiden nemese ımporttaýshydan bastap sońǵy satyp alýshyǵa deıingi búkil jolyn baqylaýǵa múmkindik beredi. Menshik quqyǵy berilgen nemese ónim bir qoımadan ekinshisine aýysqan saıyn kod skanerlenip, aqparat biryńǵaı tsıfrlyq derekqorǵa engiziledi. Al ónim dúkende satylǵan kezde Data Matrix kody kassada skanerlenip, onyń satylǵany júıede avtomatty túrde tirkeledi, — dedi spıker.
Komıtettiń túsindirýinshe, tańbalaý júıesiniń negizgi maqsaty — taýar aınalymyn ashyq etý, esepke alynbaǵan ónim men «sur» ımporttyń jolyn kesý. Jınalǵan derekter taýar aınalymyndaǵy ózgeristerdi baqylaýǵa jáne salyqtan jaltarý shemalaryn anyqtaýǵa múmkindik beredi.
Alaıda Data Matrix kodynyń bolýy ónimniń sapasyna kepildik bermeıdi.
— Qazirgi ýaqytta tańbalaý taýardyń sapasyn anyqtaý quraly emes, ol eń aldymen naryqty zańdastyrýǵa baǵyttalǵan. Bolashaqta tańbalanatyn ónimniń ruqsat qujattary men sáıkestik sertıfıkattaryn tikeleı baılanystyrý úshin júıeni Tehnıkalyq retteý jáne metrologııa komıtetiniń aqparattyq júıelerimen ıntegratsııalaý josparlanyp otyr, — dedi Nurlan Sádýaqasov.
Buǵan deıin Densaýlyq saqtaý mınıstriniń 2026 jylǵy 10 shildedegi buıryǵymen bıologııalyq belsendi qospalardy (BBQ) tańbalaýda qoldanylatyn baqylaý (sáıkestendirý) belgisi men sáıkestendirý quralynyń shekti quny belgilengeni habarlandy.
