«Bıogazǵa kóshetin ýaqyt keldi» - baspasózge sholý
***
«Egemen Qazaqstan» gazetiniń búgingi sany keshe ótken saılaýǵa arnalyp otyr. Osy oraıda basylymda daýys berý úrdisi men baıqaýshylardyń pikirleri qamtylǵan. Keshe Memleket basshysy Nursultan Nazarbaev Parlament Májilisi jáne máslıhattar depýtattarynyń saılaýlarynda halyqpen birge daýys berdi.
Qazaqstan Prezıdenti elordadaǵy Oqýshylar saraıynda ornalasqan № 81 saılaý ýchaskesine kelip, óz tańdaýyn jasady. Elbasy daýys berip bolǵan soń, otandyq jáne sheteldik BAQ ókilderiniń aldynda óz pikirin bildirdi.
Óz sózinde Memleket basshysy saılaýǵa qatysý arqyly mıllıondaǵan qazaqstandyqtar sııaqty óziniń konstıtýtsııalyq quqyǵy men azamattyq boryshyn júzege asyrǵanyn atap ótti.
- Májilis jáne jergilikti ókildi bılik organdarynyń búgingi saılaýy - Qazaqstannyń qazirgi zaman tarıhyndaǵy óte mańyzdy kezeń. Qazaqstanda jáne álem boıynsha eldiń 9 mıllıonnan astam azamaty 9900-deı saılaý ýchaskesinde daýys beredi. Kezekten tys saılaý qazir ómirimizdiń barlyq salasynda jańarý júrip jatqanyn sezingen el Parlamentiniń bastamasymen ótkizilip otyr. Biz daǵdarys úrdisterin eńseremiz, bul úshin daıyndyǵy bar jáne isti biletin jańa depýtattar qajet, - dedi Qazaqstan Prezıdenti.
Nursultan Nazarbaev el azamattarynyń saılaýdaǵy belsendiligin de óz sózine arqaý etti. Bul týraly «Elbasy halyqpen birge daýys berdi» degen maqaladan tolyq oqı alasyzdar.
Bas basylymda «Úgit jumystary zańǵa sáıkes júrgizildi» atty maqala jarııalandy. Úgitti qosa alǵanda, daýys beriletin kúnniń aldyndaǵy barlyq is-sharalar «Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes júrgizildi. Memlekettik organdar tarapynan qandaı da bir zań buzý¬shylyqtar tirkelgen joq. Bul týraly keshe Pre¬zıdent janyndaǵy Ortalyq kommýnıkatsııalar qyzmetinde ótken baspasóz máslıhatynda Bas prokýratýranyń resmı ókili Nurdáýlet Súıindikov málim etti.
«Konstıtýtsııaǵa jáne Memleket basshysynyń tapsyrmasyna saı, Bas prokýratýra aǵym¬daǵy saılaý protsesiniń zań¬dylyǵyn qamtamasyz etý boıynsha barlyq qajetti sharalardy qabyldady. Elektorattyq kezeńde azamattardyń konstıtýtsııalyq quqyqtarynyń jáne saılaý zańnamasynyń saqtalý máseleleri prokýrorlar úshin jumystyń negizgi basymdylyǵy bolyp belgilendi», dedi Bas prokýratýranyń resmı ókili.
Tek saılaý aldyndaǵy úgitti júrgizý sharttarynyń jekelegen buzýshylyqtary oryn alǵan. Naqty aıtqanda, Shyǵys Qazaqstan oblysynyń Zyrıan aýdanynda prokýratýra ýchaskelik saılaý komıssııasynyń tóraǵasy A.Ý. Júnisovaǵa qatysty máslı¬hat depýtattyǵyna kandıdattardyń birin qoldaýmen saılaý aldyndaǵy úgit júrgizgeni úshin ákimshilik is qozǵaǵan. Júnisova komıssııa tóraǵasynyń mindetterin atqarýdan bosatylyp, sondaı-aq, ony sot 30 AEK mólsherindegi aıyppul túrinde ákim¬shilik jaýapkershilikke tartqan.
Sonymen qatar, Shymkent qalasynyń Qarataý aýdanynda qalalyq máslıhattyń depýtattyǵyna kandıdattyń úgitteý materıaldaryn búldirgeni úshin qala turǵyny J.K.Býbeev ákimshilik jaýapkershilikke tartylypty. Sondaı-aq, saılaý aldyndaǵy úgitti júrgizý erejelerin buzý faktileri boıynsha prokýratýra elordanyń úsh turǵynyna zańdy buzýǵa jol berilmeıtini týraly aldyn ala eskertý jarııalaǵan.
***
«Mańyzdy saıası naýqan sanalatyn saılaýdyń tynyshtyǵyn 20 myńnan astam polıtseı qamtamasyz etýde. 24 naýryzǵa deıin kúsheıtilgen tártipke kóshken Іshki ister mınıstrligi azamattardyń tańdaý quqyǵyn alańsyz jasaýyna barlyq múmkindikti qarastyryp otyr. Sonymen birge daýys berilgen bıýlletenderdi tasymaldaý da qatań qadaǵalaýǵa alynyp tur»,-dep jazady «Aıqyn» gazeti «Qaýipsizdik barynsha qamtamasyz etildi» atty maqalady.
- Saılaý naýqany qoldanystaǵy zańnama sheńberinde qalypty jáne tynysh jaǵ¬daıda ótti. Saılaý zańnamasyn óres¬kel buzýǵa jol berilgen joq, - dedi keshe Ortalyq kommýnıkatsııalar qyzmetinde baspasóz máslıhatyn ótkizgen Іshki ister mınıstriniń birinshi orynbasary, polıtsııa general-leıtenanty Marat Demeýov.
Osy basylymda «Bıogazǵa kóshetin ýaqyt keldi» degen maqala berilgen. Qazaqstandyq bıolog-ǵalym Dáýir Raıymbekov Elbasy Nursultan Nazarbaev elimizde júzege asyrýdy maqsat tutqan «Jasyl ekonomıka» saıasatyn júrgizýde bıogazdyń artyqshylyqtary orasan zor ekenin dáleldep júr.
Ǵalymnyń aıtýynsha, bıogazdy óndirý ejelden aýyl sharýashylyǵy, onyń ishinde mal sharýashylyǵy jaqsy damyǵan qazaq eli úshin eshqandaı qıyndyq týdyrmaıdy.
«Qazirgi kúni Qazaqstanda 148 myńnan astam sharýa qojalyǵy, 131 myń ósimdik sharýashylyǵy, sondaı-aq 9567 mal sharýashylyǵy jáne 7 myńǵa jýyq alýan túrli sharýa qojalyqtary bar. Bizdiń esepteýimizshe, osy sharýa qojalyqtaryna qýattylyǵy ártúrli 148 myń bıogaz qondyrǵysyn jáne kólemi 10 sharshy metrlik 9567 qondyrǵyny ornatýǵa bolady. Osy arqyly sharýa qojalyqtaryn tolyqtaı bıogazdy paıdalanýǵa kóshirýge bolar edi»,-dep jazady maqala avtory.
