Bınıamın Netanıahý astan ýlandy

ASTANA. KAZINFORM — Izraıl premer-mınıstri Bınıamın Netanıahý 20 shildede «qaýipti nemese búlingen» taǵamdy tutynǵannan keıin gastroenterıtpen aýyrdy. Bul týraly Izraıl úkimetiniń keńsesi habarlady. 

Netanıahý aldaǵy úsh kún úıde demalady, biraq memlekettik isterdi sol jerden jalǵastyrady.

Málimdemege sáıkes, 75 jastaǵy Netanıahý túnde ózin nashar sezingen, oǵan dárigerler ishektiń qabynýy men sýsyzdaný degen dıagnoz qoıǵan. Oǵan kóktamyrishilik suıyqtyqtar beriledi.

— Dárigerlerdiń nusqaýyna sáıkes, premer-mınıstr aldaǵy úsh kúndi úıde demalyp, úkimet jumysyn úıde jalǵastyrady, - delingen Netanıahý keńsesiniń málimdemesinde.

Netanıahý senbige qaraǵan túni ózin nashar sezingennen keıin Ierýsalımdegi Hadassa ýnıversıtetiniń medıtsınalyq ortalyǵynyń professory Alon Hershkoǵa qaralyp, sýsyzdanýdyń aldyn alý úshin tamyr ishine suıyqtyq aldy.

Reuters agenttiginiń habarlaýynsha, Netanıahý 2023 jyly kardıostımýlıator (júrek rıtmin elektrlik rettegish) ornatqan. Ótken jyldyń jeltoqsan aıynda nesep shyǵarý joldarynyń ınfektsııasy dıagnozy qoıylǵan soń, oǵan qýyq asty bezin alyp tastaý operatsııasy jasalǵan.

The Jerusalem Post gazetiniń jazýynsha, premer-mınıstrdiń «memlekettik jumysyn úıden júrgizýi» onyń dúısenbi men seısenbige belgilengen qylmystyq ister boıynsha sot otyrysyna qatysa almaıtynyn bildiredi. Endi sot otyrysy qyrkúıek aıynda, sottar demalystan oralǵanda ǵana jalǵasady.

Jeksenbi kúni keshke Bınıamın Netanıahýdyń advokattary da sottan onyń osy aptaǵa josparlanǵan kýálik sessııasyn resmı túrde toqtatýdy surady. Netanıahýdyń komandasy onyń kýáligin sársenbige aýystyrýdy usyndy.

Eske sala keteıik, Netanıahýdyń aıtýynsha, Izraıl Gazaǵa qatysty dıplomatııaǵa daıyn, biraq kúsh qoldanýǵa da ázir.