Binance-tyń negizin qalaýshyǵa HAMAS-qa qarjylaı járdemdesti degen aıyp taǵyldy
ASTANA. KAZINFORM — Binance krıptobırjasynyń negizin qalaýshy Chanpen Chjao 2023 jylǵy 7 qazanda Izraılge jasalǵan shabýyldan keıin HAMAS qozǵalysynyń paıdasyna mıllıondaǵan dollar aýdarýǵa yqpal etti degen aıypqa qaldy. Bul týraly RIA Novostı habarlady.
Financial Times basylymynyń AQSh federaldyq sotyna berilgen talap-aryzǵa silteme jasap habarlaýynsha, týystary qaza tapqan, jaralanǵan nemese kepilge alynǵan amerıkalyq azamattardyń shaǵymy negizinde Chjao men onyń Binance platformasy HAMAS pen «Hezbollaǵa» «sanaly túrde eleýli qoldaý kórsetti» dep aıyptalyp otyr. Olardyń qarjy aǵyndarynyń kózderi men baǵyttaryn jasyrýǵa múmkindik bergeni aıtylǵan.
Talap-aryzda mundaı aýdarymdar Binance kompanııasy 2023 jylǵy qarashada AQSh-tyń sanktsııalardy jáne aqshany jylystatýǵa qarsy zańdardy buzdy degen aıyptardy retteý úshin 4,3 mıllıard dollardan astam tóleýge keliskennen keıin de jalǵasqany kórsetilgen.
Eske salsaq, CZ laqap atymen tanymal Chjao buǵan deıin aqshany jylystatýǵa qarsy talaptardy buzǵanyn moıyndap, tórt aıǵa bas bostandyǵynan aıyrylǵan edi, alaıda qazan aıynda ony Tramp keshirgen.
Forbes derekterine sáıkes, Chjaonyń dáýleti shamamen 86 mıllıard dollarǵa baǵalanady. Ol Binance bırjasyn 2017 jyly qurǵan jáne áli kúnge deıin kompanııanyń negizgi úlesiniń ıesi bolyp qalyp otyr. Chjao men Binance sondaı-aq Tramp áýletiniń krıptovalıýta salasyna salǵan ınvestıtsııalary aıasynda da atalady. Ótken jyly Tramptyń uldary — Erık jáne Donald-kishi — World Liberty Financial kompanııasyn qurdy.
Eske sala ketsek, byltyr AQSh-ta Binance iri krıptobırjasynyń negizin qalaýshy Chanpen Chjaonyń sottalǵanyn jazǵanbyz.