Binance krıptobırjasy 2,5 mlrd dollardyń tsıfrlyq aktıvin buǵattady
ASTANA. KAZINFORM — Binance krıptobırjasy tergeý aıaqtalǵansha tsıfrlyq aktıvterdiń qoldy bolýyna jol bermeý úshin 2,5 mlrd dollardan astam qarajatty buǵattady. Bul týraly kompanııa málimdedi, dep habarlaıdy VVS.
— Binance hakerlik shabýylǵa tap bolǵanǵa uqsaıdy, — dedi kompanııanyń burynǵy basshysy ári eń iri aktsıoneri Chanpen Chjao.
Sondaı-aq buǵattalǵan qarajat kólemi áli de artýy múmkin. Qazir kompanııa quqyq qorǵaý organdary jáne seriktesterimen birlesip, urlanǵan aktıvterdi izdeý jáne buǵattaý jumystaryn jalǵastyryp jatyr.
Chanpen Chjaonyń aıtýynsha, Tether jáne Circle krıptoplatformalary da urlanǵan 1,7 mlrd dollarǵa jýyq tsıfrlyq aktıvti buǵattaǵan.
Circle kompanııasynyń basshysy Djeremı Alleır Binance júıesindegi aqaý týraly aqparatty jiti baqylap otyrǵandaryn jáne osy oqıǵaǵa qatysy bar 800 mln dollardan astam aktıvti buǵattaǵandaryn málimdedi.
Aıta keteıik, Binance – kúndelikti saýda kólemi boıynsha álemdegi eń iri krıptovalıýta bırjasy.
Buǵan deıin Kraken halyqaralyq krıptoplatformasy Qazaqstannyń tsıfrlyq aktıvter naryǵyna shyǵyp jatqanyn habarlaǵan bolatynbyz.
