Byltyrǵy nátıje jaman emes — Memleket basshysy

ASTANA. KAZINFORM — Ótken jyldy oń kórsetkishtermen aıaqtadyq. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

— Byltyr biraz qıyndyq bolǵany ras. Ekonomıkanyń damýyna kóptegen jaǵymsyz faktorlar yqpal etti. Degenmen, biz ahýaldy ýshyqtyrmaı, baqylaýda ustaı aldyq. Jalpy nátıje jaman emes deýge bolady. Ótken jyldy oń kórsetkishtermen aıaqtadyq. Alaıda jaıbaraqat otyrýǵa bolmaıdy, sheshimin tabýy qajet túıtkilder áli de kóp. Muny sarapshylar da, azamattar da jaqsy biledi, — dedi Memleket basshysy.

Prezıdent elimizdiń ekonomıkasyn ártaraptandyrý mindeti tıisti deńgeıde oryndalmaǵanyn aıtty.

— Ekonomıkamyz Ulttyq qordyń qarjysyna asa táýeldi bolyp tur. Biraq, osy jerde atap ótýimiz kerek, Ulttyq qor — bul memlekettik ekonomıkanyń ajyramas bóligi. Bıznestiń ınvestıtsııalyq belsendigi áli de bolsa tómen deńgeıde. Bul olqylyqtardy bıyldan qaldyrmaı dereý joıý qajet. Úkimet naqty sharalar qabyldaýy tıis, — dedi Qasym-Jomart Toqaev.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy bastaldy.