Byltyrǵy quryltaıdan keıin 10 zań jobasy ázirlendi — Aımaǵambetov
ASTANA. KAZINFORM — Ulttyq quryltaı jyldan-jylǵa mańyzdy alańǵa aınalyp keledi. Bul pikirdi Parlament Májilisiniń depýtaty Ashat Aımaǵambetov aıtty.

Depýtattyń aıtýynsha, bul jaı ǵana talqylaý emes, qoǵam úshin ózekti máselelerdi anyqtaýǵa, al bılikke — olardy naqty zańdy turǵyda rásimdep, iske asyrýǵa múmkindik beretin mehanızm.
— Quryltaıda kóterilgen taqyryptardyń basym bóligi áleýmettik saıasatqa, mádenıetke jáne qoǵamdyq qundylyqtarǵa tikeleı qatysty bolǵandyqtan, salalyq komıtet tóraǵasy retinde men de osy jumystarǵa tikeleı qatysamyn. Sondyqtan, quryltaıdyń nátıjeli format ekenin nyq senimmen aıta alamyn. Atyraýda ótken úshinshi quryltaıdyń qorytyndysy boıynsha 10 zań jobasy qolǵa alyndy, onyń 9-yna Prezıdent qol qoıdy. Zań jobalarynyń kópshiligi bizdiń komıtet arqyly ótti, — dep jazdy A. Aımaǵambetov óziniń Telegram paraqshasynda.
Negizgi ózgerister arasynda oıyn bıznesin jarnamalaýǵa tyıym salý, tarıhı eskertkishter men tabıǵı nysandardy qorǵaý, marapat júıesin keńeıtý, áıelder men balalardy zorlyq-zombylyqtan qorǵaý, batyrlar esimin ulyqtaý, esirtki qylmysyna jazany kúsheıtý, onomastıka erejelerin jańartý, óńirlik rámizderdi retteý bastamalary bar.
Sonymen birge, arheologııa salasyn reformalaý jumystary josparlanyp otyr. Onda lıtsenzııalaýdyń jańa standarttary engiziledi, zańsyz qazba jumystary úshin jazalaý sharalary kúsheıtiledi. Zań jobasy boıynsha jumystar bıyl 29 qańtarda bastaldy.
— Ulttyq quryltaı — jeke-dara bastama emes, Prezıdent júrgizip otyrǵan keń aýqymdy reformalar saıasatynyń bir bóligi. «Halyq únine qulaq asatyn memleket» qaǵıdaty aıasynda quryltaı azamattar usynystaryn naqty zańdar men reformalarǵa aınaldyratyn mańyzdy quralǵa aınaldy, — deıdi A. Aımaǵambetov.
Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi.
Ulttyq quryltaı jandanǵaly eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy. Alqaly jıynda nazarda bolǵan kemshilikti túzetý zań sheńberinde bekip, qoǵamnyń oń baǵytqa bet alǵanyn baıqaımyz. Osy oraıda Kazinform tilshisi ótken quryltaılardyń nátıjesine kóz júgirtti.