Byltyrǵy bıýdjet esebine 14 depýtattyń kóńili tolmaı, qarsy daýys berdi

ASTANA. KAZINFORM — Parlament palatalarynyń birlesken otyrysynda depýtattar Úkimettiń 2023 jylǵy respýblıkalyq bıýdjettiń atqarylýy týraly esebi men Joǵary aýdıtorlyq palatanyń qorytyndysyn qabyldady. 

Talqylaý kezinde Senat depýtattary, Májilistiń «Aýyl», Respublica, Amanat partııalarynyń fraktsııalary Úkimet esebin bekitýdi qoldady. 

Al «Qazaqstan halyq partııasynyń», «Aqjol» partııasynyń fraktsııalary esepti qabyldaýdan bas tartatynyn málim etti. 

Jalpyulttyq sotsıal-demokratııalyq partııa fraktsııasy daýys berýden qalys qaldy. 

Daýys berýge qatysqan depýtattardyń ishinde Májilistiń 14 depýtaty Úkimet esebin qabyldaýdan bas tartyp daýys berdi.

Qarjy mınıstri Mádı Tákıevtiń aıtýynsha, 2023 jyly jalpy ishki ónim 5,1% ósken. Jyldyq ınflıatsııa deńgeıi 2 ese tómendep, 9,8% kóleminde turaqtalǵan. 

Jalpy bıýdjet tapshylyǵy 3,1 trln teńge nemese jalpy ishki ónimniń 2,6%-yna teń bolǵan.

Memlekettik borysh 27,2 trln teńge nemese jalpy ishki ónimniń22,8%-yna jetken.

Respýblıkalyq bıýdjettiń kiris jospary 99,9% oryndalyp, bıýdjetke 19 trln teńge túsken. Al shyǵys jospary 99,6% atqarylyp, 22,4 trln teńge bolǵan.

Igerilmegen qarajat — 73 mlrd teńge.

Ulttyq qordyń aktıvteri 13,4% ulǵaıyp, 60 mlrd dollarǵa jetken. Bıýdjet qarajatyn tıimsiz paıdalaný kólemi 489 mlrd teńge bolǵan.