Byltyr joldyń sapasyna qatysty 40 myńnan astam aryz-shaǵym túsken

ASTANA. KAZINFORM – Úkimet basshysy Oljas Bektenov oblystyq jáne aýdandyq joldardy kúrdeli jóndeýge qomaqty qarajat bólinip jatqanyn aıta kele, sapanyń syn kótermeıtinin málim etti.

- Onyń ishinde respýblıkalyq bıýdjetten de qarastyrylǵan. Alaıda, keıbir óńirlerde, jergilikti bıýdjetten qarjylandyrý kólemi jetkiliksiz bolyp otyr. Atap aıtqanda, bul – Batys Qazaqstan, Soltústik Qazaqstan jáne Abaı oblystaryna da qatysty másele. Turǵyndar joldardyń sapasyna narazy. Ótken jyly azamattardan resmı túrde osy máselege qatysty 40 myńnan astam aryz-shaǵym kelip túsken, - dedi Oljas Bektenov Úkimet otyrysynda.

Premer-mınıstrdiń aıtýynsha, óńirlerde jol ınfraqurylymyn jańǵyrtý jumystarynda qurylys tehnologııalaryn saqtamaý jáne merzimderdi keshiktirý baıqalyp otyr.

- Ákimder bul máselelerdi baqylaýǵa alýǵa tıis. Kólik aǵynyn basqarý isine zamanaýı IT-tehnologııalar men jasandy ıntellektti engizý qajet. Búgin otyrysta aıtylǵan tsıfrlyq sheshimderdi el aýmaǵyna keńinen taratýǵa bolady, - deıdi ol.

Buǵan deıin Úkimet basshysy elimizde jappaı jol apaty jıilep ketkenin aıtty. 

Sonymen qatar Oljas Bektenov BQO ákimin jol sapasyna qatysty synady.