Byltyr jolaýshylardy zańsyz tasymaldaǵan 4 333 júrgizýshi jaýapqa tartyldy

ASTANA. KAZINFORM – Memlekettik organdar ınternet-agregatorlarmen birlesip, taksımen tasymaldaýshylardyń qyzmetin retteýdiń qosymsha tetikterin pysyqtap jatyr. Bul týraly Májilis depýtattarynyń saýalyna Premer-mınıstrdiń birinshi orynbasary Roman Sklıardyń jaýabynda aıtylǵan.

- Qazirgi ýaqytta elimizdiń avtomobıl joldarynda jolaýshylar tasymalyna baqylaý kúsheıdi. «Qaýipsiz jol», «Qaýipti júrgizýshi» jáne «Tasymaldaýshy» jedel-profılaktıkalyq is-sharalary únemi ótkizilip turady, olardyń barysynda kóptegen quqyq buzýshylyqtar, sonyń ishinde zańsyz tasymaldaý (sondaı-aq qalaaralyq tasymaldaý) faktileri tirkelip otyr. 2025 jyly atalǵan is-sharalardyń qorytyndysy boıynsha jolaýshylardy zańsyz tasymaldaǵany úshin 4 333 júrgizýshi, qoǵamdyq oryndarda azamattarǵa tıisý jáne taksı qyzmetterin kórsetý maqsatynda mazalap ótinish bildirý faktileri boıynsha 16 797 adam ákimshilik jaýapqa tartyldy,- dedi birinshi vıtse-premer.

Onyń atap ótýinshe, zańnamaǵa sáıkes, taksımen tasymaldaýshy retinde qyzmettiń bastalýy habarlama jasaý sıpatynda bolady. Bul rette tasymaldaýshylar úshin erekshe talaptar kózdelgen. Atap aıtqanda mindetti medıtsınalyq tekserýler, eńbek jáne demalys rejımin saqtaý, sondaı-aq jolaýshylardy saqtandyrý talaptary bar.

- Sonymen qatar jolaýshylar tasymalyna baqylaýdy kúsheıtý maqsatynda memlekettik organdar ınternet-agregatorlarmen birlesip taksımen tasymaldaýshylardyń qyzmetin retteýdiń qosymsha tetikterin pysyqtaýda, - dedi Roman Sklıar.

Aıta keteıik, Almaty men Astanada júrgizýshisiz taksı jobasy iske qosyldy.