Byltyr jylýsyz qalǵan Rıdder qys maýsymyna daıyn ba – ákim esebi
Shyǵys Qazaqstan oblysynyń ákimi Ermek Kósherbaev eseptik kezdesýinde byltyr jylýsyz qalǵan Rıdder qalasynyń qazirgi daıyndyq jumystary týraly aıtty, dep habarlaıdy Kazinform agenttigi.
«Ótken jylytý maýsymy Rıdder JEO-daǵy apattan bastaldy, onda qalanyń 50 myń halqy jylýsyz qaldy. Memleket basshysy jylý elektr stantsııalarynyń úzdiksiz jumysyn jáne jylý berý maýsymyna daıyndyqty qamtamasyz etý jóninde tikeleı tapsyrma berdi. Úkimettiń qoldaýymen óte qysqa merzimde biz Rıdder JEO-da 6 qazandyq agregatyna jóndeý júrgizip, jylytý maýsymyn ýaqytyly bastadyq», - dedi E. Kósherbaev Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, jóndeý-qalpyna keltirý jumystaryna 16 merdiger uıym jumyldyryldy, 500-den astam adam tartyldy, olar 2 aýysymda turaqty jumys istedi.
«Qazir Rıdder qalasynyń turǵyndary jylýmen, sýmen, elektrmen qamtamasyz etilgen. Qazir 2 orta qysymdy qazandyq agregaty men 1 rezervte jumys istep jatyr, qalǵan 3 joǵary qysymdy qazandyq boıynsha iske qosý-jóndeý jumystary júrgizilýde, olar jeltoqsan aıynyń ortasyna deıin aıaqtalady. 12 qazanda Rıdder JEO qalalyq kommýnaldyq menshikke qabyldandy», - dedi ol.
Sonymen qatar, «Qazmyrysh» kásipornyn energııamen jabdyqtaý qalpyna keltirilgen.
«Reseı men Qazaqstannyń shekaralas aımaqtarynyń forýmynda Energetıka mınıstrligi Óskemende JEO salatynyn jarııalady. Bul biz úshin jaqsy jańalyq. Óskemende qalanyń sol jaǵalaý bóliginiń jańadan salynyp jatqan aýdandary úshin qosymsha jylý energııasy kózi qajet (232 Gkal/saǵat tapshylyq bar)», - dedi Ermek Kósherbaev.
