Byltyr jeltoqsanda qyzylshadan eki sábı qaıtys boldy – mınıstrlik
2023 jyldyń jeltoqsan aıynda qyzylshadan qaıtys bolý faktisi tirkeldi, ekeýi de aılyq sábı. Bul týraly Densaýlyq saqtaý mınıstrligi ana men bala densaýlyǵyn qorǵaý departamenti dırektorynyń orynbasary Áıgerim Ospanova málim etti, dep habarlaıdy Kazinform.
«Ótken jyly jeltoqsanda qyzylshadan balalar óliminiń eki jaǵdaıy tirkeldi. Sonyń biri ShQO-da boldy, 6 aılyq bala kóz jumdy. Alǵashynda ata-anasy balany aýrýhanaǵa jatqyzýdan bas tartty. Ýaqyt óte kele sábıdiń jaǵdaıy nasharlap, dert asqynyp ketken. Aıta ketý kerek, ShQO-daǵy balanyń anasy vaktsına almaǵan», - dedi Áıgerim Ospanova Ortalyq kommýnıkatsııalar qyzmeti alańynda ótken baspasóz máslıhatynda.
Mınıstrlik ókiliniń aıtýynsha, sábıdiń ólimi qyzylshadan bolǵany medıtsınalyq-saraptamalyq turǵydan rastaldy.
«Ekinshi jaǵdaıǵa kelsek, ol — 4 aılyq sábı. Bala óte aýyr jaǵdaıda qabyldandy. Búgingi tańda saraptamalar júrgizilip, qyzylsha dıagnozy rastaldy», - dedi ol.
Aıta keteıik, buǵan deıin Aqtaýda qyzylsha juqtyrǵan tórt bala jansaqtaý bóliminde jatqany týraly habarlaǵan bolatynbyz.
