Byltyr jedel járdem 8 mln-nan astam shaqyrtýǵa qyzmet kórsetti
ASTANA. KAZINFORM — Jyl saıyn 28 sáýirde Jedel medıtsınalyq járdem qyzmeti qyzmetkerleriniń kúni atap ótiledi – bul kún kásibı mereke retinde adam ómirin saqtap qalý jolynda táýlik boıy jedel áreket etetin mamandardyń eńbegin aıshyqtaıdy, dep vedomstvonyń baspasóz qyzmeti málim etti.
— Tek 2025 jyldyń ózinde Qazaqstannyń jedel medıtsınalyq járdem qyzmeti 8 mln-nan astam shaqyrtýǵa qyzmet kórsetse, bıylǵy jyldyń úsh aıynda bul kórsetkish shamamen 1,8 mln-dy qurady, — delingen habarlamada.
Jedel medıtsınalyq járdem qyzmeti densaýlyq saqtaý júıesiniń negizgi ári asa jaýapty býyndarynyń biri bolyp tabylady. Dál osy qyzmettiń brıgadalary shaqyrtýǵa birinshi bolyp jetip, patsıentterdiń ómirine qaýip tóngen synı jaǵdaılarda jedel ári bilikti medıtsınalyq kómek kórsetedi. Mundaı sátterde ár mınýttyń mańyzy zor. Qazaqstanda jedel medıtsınalyq járdem qyzmeti 20 derbes stantsııadan, 93 qalalyq kishi stantsııadan jáne 189 aýdandyq bólimsheden turady. Olar halyqqa táýlik boıy úzdiksiz jáne ýaqtyly shuǵyl kómek kórsetýdi qamtamasyz etedi. Qyzmettiń jumysyn Ulttyq shuǵyl medıtsınany úılestirý ortalyǵy úılestiredi.
— Oblystyq jáne qalalyq stantsııalarda bir aýysymda 1 652 kóshpeli brıgada, onyń ishinde 16%-y dárigerlik, 84%-y feldsherlik brıgadalar jumys isteıdi. 2025 jyldyń qorytyndysy boıynsha jedel járdem brıgadalarynyń qatysýymen aýrýhanaǵa deıingi ólim kórsetkishi 2024 jylmen salystyrǵanda 0,2%-ǵa tómendedi. Sonymen qatar sátti reanımatsııa kórsetkishi 7,9%-ǵa artty. Qazaqstanda jedel medıtsınalyq járdem qyzmeti halyqqa shuǵyl medıtsınalyq kómektiń qoljetimdiligin qamtamasyz etetin densaýlyq saqtaý júıesiniń mańyzdy quramdas bóligi bolyp qala beredi, — delingen habarlady vedomstvodan.
Sońǵy jyldary bul qyzmetti jańǵyrtýǵa, avtoparkti jańartýǵa, tsıfrlyq sheshimderdi engizýge jáne medıtsına qyzmetkerleriniń biliktiligin arttyrýǵa erekshe kóńil bólinip otyr.
Eske sala keteıik, elimizdegi barlyq jedel járdem qyzmetkerleri beınetirkegishpen qamtamasyz etiledi.
