Byltyr Túrkııanyń týrızmnen túsken tabysy rekordtyq kórsetkishke jetti

ASTANA. KAZINFORM — 2024 jyly Túrkııanyń týrızmnen túsetin kirisi jyldyq mánde 8,3 paıyzǵa ósip, 61,1 mlrd AQSh dollaryna jetti, dep jazady Sınhýa.

 Bul týraly juma kúni túrik statıstıka ınstıtýty habarlady.

— Týrızmnen túsetin túsimder orta merzimdi baǵdarlamanyń nysanaly kórsetkishterinen asyp, 2024 jyldyń qorytyndysy boıynsha 61,1 mlrd AQSh dollaryn qurap, bizdiń tarıhymyzdaǵy eń joǵary deńgeıge jetti, — dep jazdy H áleýmettik jelisinde respýblıkanyń vıtse-prezıdenti Djevdet Iylmaz.

Onyń aıtýynsha, ótken jyly Túrkııaǵa barlyǵy 62,2 mln týrıst kelgen. Bul kórsetkish te bıliktiń boljamynan asyp túsken kórinedi.

Vıtse-prezıdent atap ótkendeı, endi Túrkııa úkimeti týrızmnen 63,6 mlrd dollar tabys tabýdy josparlap, 2025 jyly osy oń dınamıkanyń saqtalýyn kútýde.

Resmı statıstıkaǵa sáıkes, týrıstik kiristiń shamamen 17 paıyzy elge saparmen kelgen rezıdent emes túrik azamattarynan túsken. Bul rette týrızmnen túsetin túsimderdiń jalpy kóleminiń 43,9 mlrd AQSh dollary saıahatshylardyń jeke shyǵyndary quraǵan. Al pakettik týrlarǵa olar shamamen 17,4 mlrd AQSh dollaryn jumsaǵan.

Budan buryn Túrkııa jasóspirimderdiń áleýmettik jelini paıdalanýyna shekteý engizgenin habarlaǵan edik.