Byltyr tólem qolma-qol álde kartamen kóbirek jasaldy ma

ASTANA. KAZINFORM — 2024 jyly halyq ortasha eseppen qazaqstandyqtar 453,6 mlrd teńgege kún saıyn qolma-qol aqshasyz 35,1 mln operatsııa júrgizdi. 

- Halyqtyń qolma-qol aqshasyz operatsııalarynyń ósiminde oń úrdis saqtalyp otyr. 2024 jyldyń qorytyndysy boıynsha, qolma-qol aqshasyz operatsııalar sanynyń ósýi 13,4% (jalpy sany – 12,8 mlrd operatsııa), kólemi – 17% (jalpy kólemi – 166,1 trln teńge) boldy. 2024 jyly halyq iske asyrǵan barlyq tranzaktsııa ishinen sany jaǵynan 98%-y jáne kólemi jaǵynan 87%-y – qolma-qol aqshasyz operatsııalar. Bul óz kezeginde qarjylyq tehnologııalarǵa halyqtyń joǵary senimin bildiredi, sebebi qolma-qol aqshasyz tranzaktsııa júrgizý yńǵaıly ári ýaqyt jaǵynan ónimdi, - delingen Ulttyq bank habarlamasynda.

2024 jyly qolma-qol aqshasyz tranzaktsııalardyń negizgi úlesi bankterdiń onlaın servısi arqyly júrgizildi (qolma-qol aqshasyz tranzaktsııalar kóleminiń 90%-y).

Bul rette bankterdiń onlaın-servısin paıdalanýshylar sany 13%-ǵa (25,9 mln deıin ulǵaıdy. Bir jyl ishinde ınternet pen mobıldi bankıngtiń bir paıdalanýshysyna keletin onlaın-tranzaktsııa kólemi orta eseppen 7%-ǵa (6,1 mln teńgege deıin) ósti.

Klıent banktiń onlaın-servısterin bir ret jáne odan da kóp paıdalanǵan kezde qoldanýshylar árbir bank boıynsha jeke-jeke esepke alynady.

Eske salsaq Kirister departamenti salyqtan jaltarý úshin qolma-qol aqsha talap etý zańsyzdyq ekenin málimdegen bolatyn.