Byltyr sport jáne oıyn-saýyq qyzmetteri 878,1 mlrd teńgege jetti
ASTANA. KAZINFORM — Búgin — Dúnıejúzilik adal oıyn kúni. Osy ataýly kúnniń qurmetine Ulttyq statıstıka bıýrosy sport salasynyń damýyna qatysty derekterge toqtaldy.
BUU Bas Assambleıasy bekitken bul kún sporttaǵy adaldyq, dostyq pen ashyqtyq qaǵıdattaryn nasıhattaıdy. Bul bastama 2013 jyly Panathlon uıymynyń is-sharalarynan bastaý alyp, Fair Play halyqaralyq qozǵalysynyń qoldaýymen keń tarady.
Byltyrǵy qańtar-jeltoqsan aılary aralyǵynda Qazaqstanda sport, demalys jáne oıyn-saýyq salasynda kórsetilgen qyzmetterdiń jalpy kólemi 878,1 mlrd teńgeni qurady. Bul 2024 jyldyń osy kezeńimen salystyrǵanda 21,3% artyq.
Salalar boıynsha bólinisi mynadaı:
-
Sport salasyndaǵy ózge qyzmet túrleri — 159,4 mlrd teńge;
-
Fıtnes-klýbtardyń qyzmeti — 79,7 mlrd teńge;
-
Sport klýbtarynyń qyzmeti — 67,3 mlrd teńge;
-
Sport nysandaryn paıdalaný — 46,7 mlrd teńge;
-
Oıyn-saýyq saıabaqtarynyń qyzmeti — 34,0 mlrd teńge.
Eń úlken úles — 55,3%, ıaǵnı 485 mlrd teńge, demalys pen oıyn-saýyqty uıymdastyrýǵa qatysty ózge qyzmet túrlerine tıesili.
Aımaqtar boıynsha eń kóp qyzmet kólemi Almaty qalasynda tirkeldi — 379,8 mlrd teńge, keıin Astana qalasy — 135,5 mlrd teńge jáne Almaty oblysy — 38,7 mlrd teńge.
Buǵan deıin stat bıýro 2026 jylǵy birinshi toqsanda Qazaqstanda Halyqaralyq eńbek uıymynyń ádistemesi boıynsha jumyssyzdyq deńgeıi 4,5% bolǵanyn habarlady.
