Sybaılas jemqorlyq týraly habarlaǵandarǵa 24 mln teńgeden astam syıaqy berildi

ASTANA. KAZINFORM – Ulttyq qaýipsizdik komıteti 2025 jyly sybaılas jemqorlyqqa qarsy baǵytta júıeli jumys júrgizip, 895 adamnyń zańsyz áreketiniń jolyn kesti. 

Vedomstvo málimetinshe, eseptik kezeńde 1 052 qylmystyq is qozǵalyp, onyń 969-y boıynsha tergeý aıaqtalǵan. Sonyń ishinde 860 qylmystyq is sotqa joldandy.

- Tergeý barysynda sybaılas jemqorlyq quqyqbuzýshylyqtarynyń basym bóligi para alý jáne bıýdjet qarajatyn jymqyrý derekterine qatysty ekeni anyqtalǵan. Qabyldanǵan sharalar nátıjesinde el bıýdjetine 16,1 mlrd teńge qaıtarylyp, quny 3,3 mlrd teńge bolatyn múlikke tyıym salyndy, - delingen aqparatta.

Sondaı-aq sybaılas jemqorlyq faktileri týraly habarlaǵany úshin 61 azamatqa jalpy somasy 24,2 mln teńge kóleminde syıaqy tólengen.

UQK sybaılas jemqorlyqqa qarsy is-qımyl baǵytyndaǵy jumystardyń aldaǵy ýaqytta da jalǵasatynyn málimdedi.

Aıta keteıik, AShM Sybaılas jemqorlyqqa qarsy jańa standartty bekitti.