Byltyr sharýalarǵa 5 mlrd teńge sýbsıdııa negizsiz berilgen

ASTANA. KAZINFORM — Senat depýtaty Arman Óteǵulov 2024 jylǵy bıýdjettiń ıgerilýi týraly esepti talqylaý kezinde aýyl sharýashylyǵynda sýbsıdııa zańsyzdyqtardy atady.

— Sońǵy bes jylda aýylsharýashylyq salasyna 2,2 trln teńge bólinip, tek 2023-2024 jyldary jalpy soma 1 trln teńgege jetti. Bul — az qarajat emes. Alaıda, 2024 jyly janýarlar men ósimdikterden alynatyn ónimder jáne daıyn azyq-túlik taýarlarynyń eksporty 5 mln dollar ǵana bolǵan. ıAǵnı barlyq eksporttalatyn ónimniń 6,2%-y ǵana. Al elimizge syrttan keletin ımport kólemi 6,7 mln dollarǵa jetip, 11% bolǵan. Bul ımportqa táýeldiliktiń áli de joǵary ekenin kórsetedi, — dedi Senat depýtaty.

Onyń aıtýynsha, sýbsıdııalar men jeńildetilgen nesıelerdi zańsyz berý faktileri de azaımaı otyr.

— Sýbsıdııaǵa ótinim berip, kútý paraǵyna tirkelgen sharýalarǵa tólenýi tıis qarajat kólemi 373 mlrd teńgeden asty. Bul tek 8 sýbsıdııa túri boıynsha ǵana alynǵan málimet.
ıAǵnı, sýbsıdııaǵa bólingen qarajattyń 50 paıyzdan astamy kútý paraǵyndaǵy qaryzdardy jabýǵa jumsalady degen sóz. Osy salaǵa júrgizilgen aýdıt nátıjesine keletin bolsaq, qyzmetin toqtatqan nemese kásipkerlik sýbektisi bolyp tabylmaıtyn 2 500 nysanǵa 5 mlrd teńge negizsiz sýbsıdııa tólengen. Sondaı-aq, aýyl sharýashylyǵy salasyna qatysy joq 2 900 sýbektige 5,4 mlrd teńge kóleminde ekonomıkalyq qyzmet túrleriniń jalpy jikteýishi (OKED) kórsetilmeı sýbsıdııa berilgen, — dedi Arman Óteǵulov.

Byltyr Joǵary aýdıtorlyq palata eldiń ońtústiginde «108 jastaǵy» sıyrǵa sýbsıdııa tólengenin rastaǵan edi.