Byltyr rekordtyq kólemde turǵyn úı paıdalanýǵa berildi

ASTANA. KAZINFORM — Bıyl elimiz boıynsha 18,5  mln sharshy metr turǵyn úı salynady. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.

- Memleket basshysy saılaýaldy baǵdarlamasynda Úkimetke 7 jyl ishinde 111 mln sharshy metr turǵyn úı salýdy tapsyrǵan bolatyn. Osy merzim aralyǵyndaǵy úsh jylda turǵyn úı qurylysy josparlanǵan kórsetkishten asyra oryndalyp jatyr. Ótken jylǵy jospar 19,2 mln sharshy metr boldy. Jyl qorytyndysy boıynsha atalǵan jospar asyra oryndalyp, rekordtyq kólemde, ıaǵnı 20,1 mln sharshy metr turǵyn úı paıdalanýǵa berildi. Jalpy, josparly kórsetkish on segiz óńirde artyǵymen oryndaldy, - dedi mınıstr.

Onyń málimetinshe, bıyl turǵyn úı qurylysynyń boljamdy kólemi 18,5 mln sharshy metr jáne qosymsha sharalar qoldanǵan jaǵdaıda bul kórsetkishti arttyrýǵa múmkindik bar.

- Eń joǵary kólem Astana, Almaty jáne Shymkent qalalarynda boljanyp otyr, - dedi Ersaıyn Naǵaspaev.

Bıyldan bastap satyp alynatyn páterlerdiń ornalasqan jerin jergilikti atqarýshy organdar ózderi anyqtaıdy. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.