Byltyr portal arqyly ońaltý qyzmetterine suranys joǵary boldy

ASTANA. KAZINFORM — 2025 jyly múgedektigi bar adamdar Áleýmettik qyzmetter portaly arqyly 595 myńnan astam qyzmet aldy. Bul týraly Eńbek jáne halyqty áleýmettik qorǵaý mınıstrligi málim etti.

Vedomstvonyń dereginshe, 2025 jyldyń basynan bastap Áleýmettik qyzmetter portaly (budan ári — Portal) arqyly múgedektigi bar adamdardyń 595,6 myń tapsyrysy oryndaldy, onyń ishinde: shamamen 440 myń múgedektigi bar adam ońaltýdyń tehnıkalyq quraldaryn (budan ári — OTQ), 9,8 myń — ymdaý tili qyzmetin, 26,5 myń — jeke kómekshiniń, 119,3 myń — shıpajaılyq-kýrorttyq emdeý qyzmetin alǵan.

— Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asyrylady. Tapsyrys berilgen ońaltýdyń tehnıkalyq quraldaryn jetkizý nemese óz betinshe áketý arqyly alýǵa bolady, — delingen habarlamada.

Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq kreslo-arbalar berýdi qamtıdy.

Búginde Portalda 595 arnaýly áleýmettik qyzmet kórsetýshi, 1084 OTQ jetkizýshisi, 32 myńnan astam jeke kómekshi, 766 ymdaý tili jáne 124 shıpajaılyq-kýrorttyq emdeý qyzmetterin usynýshy tirkelgen.

Portaldy paıdalaný boıynsha konsýltatsııalardy qoldaý baılanys ortalyǵynan, ıaǵnı 1414 biryńǵaı nómiri arqyly alýǵa bolady.

Buǵan deıin habarlanǵanymyzda, Almatyda múmkindigi shekteýli azamattar ınvataksı qyzmetin túnde de paıdalana alady.