Byltyr ózbekstandyq kedenshiler 2,8 tonnadan astam esirtki men psıhotroptyq zattardy tárkiledi

TAShKENT. KAZINFORM – 2025 jyly ózbekstandyq kedenshiler shekaradaǵy ótkizý beketterinde 1,8 tonnadan astam esirtki men 1 tonnadan kóp psıhotroptyq zattardy tárkiledi.

Bul týraly Memlekettik keden komıtetiniń Strategııalyq josparlaý jáne kedendik rásimderin ońaılatý basqarmasynyń bastyǵy Farhod Olımjonov aıtty, dep habarlaıdy Kazinform agenttiginiń menshikti tilshisi.

- Jyl saıyn taýar aınalymy artyp, týrıster sany kóbeıip keledi. Atap aıtqanda, 2024 jyly Ózbekstan shekarasynan 4,5 mıllıonnan astam kólik ótken bolsa, byltyr bul kórsetkish 5,5 mıllıonǵa jetti. 2025 jyly keden zańnamasyn buzýdyń 40 myńnan astam faktisi anyqtaldy. Máselen, dári-dármekti zańsyz ákelgen 1 myńnan asa jaǵdaı tirkeldi. Sonymen qatar, 1,8 tonna esirtki, 1 tonna psıhotroptyq zattar jáne 150 keliden kóp zergerlik buıymdar tárkilendi, - dedi Kazinform agenttigi tilshisiniń saýalyna jaýap bergen Farhod Olımjonov.

Onyń aıtýynsha, anyqtalǵan ár fakti boıynsha ákimshilik jáne qylmystyq is qozǵalǵan.

- Keden organdarynyń sergek áreket etýi mundaı derekterdi ýaqytyly anyqtaýǵa sep bolyp jatyr. Bizdiń vedomstvo bir jaǵynan shekaradan ótý protsesterin jeńildetýmen aınalyssa, ekinshi jaǵynan qatań baqylaý júrgizý mindetin minsiz atqarýy tıis, - dep túıindedi Farhod Olımjonov.

Eske salaıyq, byltyr Qazaqstan men Ózbekstan arasyndaǵy taýar aınalymy 5 mlrd dollarǵa jýyqtady.

Munymen birge, Ózbekstan 2030 jylǵa qaraı 20 mln sheteldik týrıst qabyldaýǵa nıetti.