Byltyr Ózbekstandaǵy qazaq jazýshylarynyń onnan astam kitaby jaryq kórdi
TAShKENT. KAZINFORM — 2025 jyly Ózbekstandaǵy birqatar qazaq jazýshysynyń kitaby jaryq kórdi. Bul týraly Tashkentte ótken Qazaq ádebıeti keńesiniń esep berý jıynynda málim boldy, dep habarlaıdy Kazinform agenttiginiń menshikti tilshisi.
Ózbekstan Jazýshylar odaǵyna qarasty Qazaq ádebıeti keńesiniń jyldy qorytyndylaý otyrysyna osy eldegi qazaq qalamgerleri, jýrnalıster men stýdentter qatysty.
— Ótken jyly Ózbekstandaǵy qazaq jazýshylarynyń onnan astam kitaby jaryq kórdi. Onyń ishinde qalamgerlerdiń tól týyndylary basym. Atap aıtqanda, ǵalym, ádebıettanýshy Qaldybek Seıdanovtyń «Abaı jáne Orta Azııa ádebıeti» atty monografııalyq eńbegi baspadan shyqty. Sondaı-aq, aqyn Zamıra Musaevanyń balalarǵa arnalǵan «Móldir bolsyn júrekter» kitaby oqyrmanǵa usynyldy, — dedi Qazaq ádebıeti keńesiniń tóraǵasy Tursynáli Ahmetov.
Jınalysta málim bolǵandaı, byltyr «Ózbekstandaǵy qazaq aqyndarynyń óleńder jınaǵy» eńbegi jaryq kórdi. Oǵan jazýshy Naýryzbaı Jarbosynulynyń, jas aqyn Meırambek Ábdiqalıev pen Barshyn Myrzabekqyzynyń týyndylary endi.
2025 jyly aýdarma baǵytynda da ilkimdi is atqarylǵan. Máselen, Ózbekstannyń Halyq jazýshysy Haırıddın Sýltanovtyń «Baqyt jaǵalaýy» atty prozasy qazaq tiline tárjimalandy.
— Bul jumystar qazaq-ózbek ádebı baılanystarynyń jańa deńgeıge kóterilgenin aıǵaqtaıdy, — dep málim etti Tursynáli Ahmetov.
Jalpy, jyl saıyn Ózbekstanda birtýar qazaq jazýshylarynyń mereıtoıy atalyp ótedi. Máselen, byltyr Abaı Qunanbaıulynyń 180 jyldyǵy keń kólemde toılandy. Onyń aıasynda ádebı keshter uıymdastyrylyp, ǵylymı-tanymdyq konferentsııalar ótkizildi.
— Byltyr Abaı Qunanbaıulynyń 38-shi qara sózi túpnusqa negizinde ózbek tiline qaıta aýdaryldy. Ony ádebıettanýshy Bahodır Karım tárjimalady. Munymen birge, taıaýda Ózbekstannyń Halyq aqyny Abdýlla Arıpovtyń «Ádilet shýaǵy» kitaby qazaq tiline aýdarylyp, baspadan shyqty. Aldaǵy ýaqytta onyń tusaýkeserin uıymdastyramyz, — dedi Qazaq ádebıeti keńesiniń tóraǵasy.
Sondaı-aq, bıyl kórshiles elde qazaq qalamgeri Ómirzaq Qojamuratovtyń 95 jyldyq mereıtoıy atalyp ótedi. Buǵan qosa, aqyn Tólegen Aıbergenovtiń óleńderin nasıhattaýǵa arnalǵan ádebı keshter uıymdastyrý josparlanǵan.
Eske salaıyq, 2024 jyly Ózbekstandaǵy qazaq qalamgerleriniń 20-ǵa jýyq kitaby jaryqqa shyqqan edi.