Byltyr Ózbekstandaǵy qazaq qalamgerleriniń 20-ǵa jýyq kitaby jaryqqa shyqty
TAShKENT. KAZINFORM – Tashkent qalasynda Ózbekstan Jazýshylar odaǵyna qarasty Qazaq ádebıeti keńesiniń esep berý otyrysy ótti, dep habarlaıdy Kazinform agenttiginiń menshikti tilshisi.
Jıynǵa keńes tóraǵasy, músheleri men Ózbekstandaǵy belgili qazaq qalamgerleri qatysty. Onyń barysynda byltyr atqarylǵan jumystar qorytyndylanyp, qazaq-ózbek ádebı baılanystaryn nyǵaıtý múmkindikteri talqylandy.
— Byltyr Ózbekstandaǵy qazaq qalamgerleriniń 20-ǵa tarta kitaby jaryq kórdi. Eńbekterdiń teń jartysy Qazaqstandaǵy baspalardyń kómegimen jarııalandy. Sondaı-aq birqatar qazaq jazýshysynyń shyǵarmasy Ózbekstanda basylyp shyqty. Bul eki el arasyndaǵy ádebı baılanystardyń tereńdeı túskenin aıǵaqtap otyr, - dedi Qazaq ádebıeti keńesiniń tóraǵasy Tursynáli Ahmetov.
2024 jyly Ózbekstandaǵy qazaq qalamgerleri Abdýlla Rústemovtiń «Qaıran dúnıe», Saparbek Imanbekovtiń «Dostarymyz jyrlaıdy» atty eńbekteri jarııalandy. Sonymen qatar Jarasqan Myrzamuratovtyń «Aqıqattyń dámi aşy» jáne Lola Júnisqyzynyń «Qarasý jyrlary» kitaptary basylyp shyqty.
— «Otandastar» qory men Qazaqstan Jazýshylar odaǵy uıymdastyrǵan «Uly dala» halyqaralyq baıqaýynda Jarasqan Myrzamuratov pen Lola Júnisqyzy jeńimpaz atandy. Muny Ózbekstandaǵy qazaq qalamgerleriniń jetistigi dep sanaımyz. Atalǵan eki jazýshy Ózbekstan Jazýshylar odaǵynyń múshesi atandy. Sondaı-aq aqyn Qoshqarbaı Baıjigitov te odaqtyń músheligine ótti, - dedi Tursynáli Ahmetov.
Búginde kórshiles memlekette qolyna qalam ustaǵan 70-ke jýyq qandasymyz bar, solardyń 13-i - Ózbekstan Jazýshylar odaǵyna múshe.
Olar kóbine kórkem aýdarma, poezııa baǵyttarynda jemisti eńbek etip keledi. Bul rette byltyr Ózbekstandaǵy Qazaq ádebıeti keńesiniń tóraǵasy Tursynáli Ahmetov Qazaqstan Jazýshylar odaǵynyń múshesi kýáligin aldy.
Aıta keteıik, Ózbekstandaǵy qandas qalamgerlerdiń eńbekteri osy memlekettegi qazaq mektepterine taratylady.