Byltyr Ózbekstanda jol apatynan 2 myńnan astam adam qaza tapty

TAShKENT. KAZINFORM – Ózbekstannyń Olıı Majlıs Senatynda krımınogendik jaǵdaıdy turaqtandyrý jáne quqyq qorǵaý salasyndaǵy máseleler tylqylandy, dep habarlaıdy Kazinform agenttiginiń menshikti tilshisi.

Otyrys barysynda Ózbekstan ІІM ókilderi senatorlarǵa byltyr elde tirkelgen quqyq buzýshylyqtar týraly baıandady. Resmı derekke saı, 2024 jyly respýblıkada 132 298 qylmys jasalǵan.

Іshki ister organdary onyń 92,4 paıyzyn áshkerelep, izdeýde júrgen 8 736 adamdy ustaǵan. Sonymen birge, iz-túzsiz joǵalǵan 567 ózbekstandyq tabyldy.

Buǵan qosa, sybaılas jemqorlyq jáne ekonomıkalyq qylmys jasaǵan 3 880 adam temir torǵa qamalyp, olardan 239,5 mlrd sým (shamamen $18,6 mln) qarajat óndirip alyndy.

Qysym kórgen jáne zorlyq-zombylyq áreketterinen zardap shekken 54 myńnan astam áıelge qorǵaý orderi usynyldy. Sondaı-aq, otbasylyq janjaldyń qurbany bolǵan 625 áıel Ońaltý jáne beıimdeý ortalyqtaryna ornalastyryldy.

Munymen birge, senatorlar jol-kólik oqıǵalarynyń jıilep bara jatqanyn atap ótti. ІІM deregine saı, byltyr 9 364 apat bolyp, saldarynan 8 901 azamat jaraqat aldy jáne 2 203 adam qaza tapty.

Jol-kólik apattarynyń 47,1 paıyzy júrgizýshilerdiń jaıaý júrginshilerge jol bermeýinen, 22,8 paıyzy joǵary jyldamdyq pen 3,7 paıyzy rýlde qalǵyp ketý saldarynan bolǵan.

Tirkelgen kıberqylmystardyń da sany az emes. Byltyr 58,8 myń qylmys jasaldy. Barlyq jaǵdaıda azamattardyń bank kartalarynan qarajat jymqyrylǵan.

Eske salaıyq, endi Ózbekstanda jol erejesin jıi buzatyndar endi kólik basqarý quqyǵynan aıyrylady.

Buǵan deıin Ózbekstanda avtobýs jolaǵyna túsken kólik júrgizýshilerine aıyppul salynýy múmkin ekenin jazyp edik.

Byltyr mas kúıinde kólik basqarǵan 31,3 myń ózbekstandyq ákimshilik jaýapqa tartyldy.

Buǵan qosa, endi Ózbekstanda balasyna zańsyz dinı tárbıe bergen ata-analarǵa aıyppul salynady.