Byltyr Ózbekstanda jasalǵan jemqorlyq qylmystary memleketke $228 mln zalal keltirdi

TAShKENT. KAZINFORM – Byltyr Ózbekstanda sybaılas jemqorlyq qylmysyn jasaǵan 7 354 adam jaýapqa tartyldy, dep habarlaıdy Kazinform agenttiginiń menshikti tilshisi.

Sybaılas jemqorlyqqa qarsy is-qımyl agenttiginiń deregine saı, 2024 jyly 7,3 myńnan astam adamnyń ústinen 4 649 qylmystyq is (2023 jyly 4 128 is) qozǵalǵan. Bul rette sottalǵandar sany ótken jyldarmen salystyrǵanda 12,5%-ǵa ósti. Atap aıtqanda, 2023 jyly 6 535 adam temir torǵa qamalǵan edi.

– Sybaılas jemqorlyqtan memleket múddesine 2 trln 812 mlrd sým (shamamen $228,3 mln) zalal kelgeni anyqtaldy, - delingen Sybaılas jemqorlyqqa qarsy is-qımyl agenttiginiń Ulttyq baıandamasynda.

2023 jyly jemqorlyq qylmystarynan el ekonomıkasy 1,4 trln sým ($113,6 mln) shyǵynǵa batqan edi. Zalal kólemi boıynsha Andıjan (680 mlrd sým), Tashkent (332 mlrd sým), Namangan (308 mlrd sým) jáne Syrdarııa oblystary (289 mlrd sým) kósh bastap tur. 

Eske salaıyq, byltyr Ózbekstanda qylmystyq jaýapqa tartylǵan laýazymdy tulǵalardyń sany 37,2%-ǵa ósti. Tıisinshe, jemqor sheneýnikter memleketke $278,3 mln zalal keltirdi.

Sonymen qatar taıaýda Ózbekstannyń burynǵy aýyl sharýashylyǵy mınıstrine qatysty sot úkimi shyqty. 

Sondaı-aq bıyl naýryzda Ózbekstan prezıdenti jemqorlyqpen kúreske jaýapty 117 sheneýnikti qyzmetinen bosatýdy tapsyrǵan bolatyn. 

Buǵan deıin habarlaǵanymyzdaı, Ózbekstanda jemqorlyqqa beıim keletin sheneýnikterdi erte anyqtaý tájirıbesi engizilmek.