Byltyr Ózbekstan úkimeti shetelde qıyn jaǵdaıda qalǵan otandastaryn elge qaıtarýǵa $1,3 mln jumsady

TAShKENT. KAZINFORM – 2025 jyly Ózbekstan 3 709 otandasyn elge qaıtardy, dep habarlaıdy Kazinform agenttiginiń menshikti tilshisi.

Kóshi-qon agenttiginen málim etkendeı, bul baǵyttaǵy jumystarǵa 15,9 mld sým (shamamen $1,3 mln) qarajat jumsalǵan.  

Adam saýdasyna qarsy kúres úshin 30 shilde men 30 tamyz aralyǵynda uıymdastyrylǵan «Vatanga kaıtarısh» (Otanǵa qaıtarý) aktsııasy aıasynda 1,3 myń azamat Ózbekstanǵa oraldy. Baǵdarlama aıasynda shet elderdiń aýmaǵynda qıyn jaǵdaıda qalǵan adamdar elge jetkizildi. Olardyń ishinde jazataıym oqıǵalardan zardap shekken, aýyr dertke shaldyqqan 66 azamat arnaıy bortpen jetkizildi.

Ózbekstandyqtardyń jol, dári-dármek jáne qujat rásimdeý shyǵyndary Kóshi-qon agenttiginiń esebinen óteldi.

Eske salaıyq, 21 qańtarda AQSh-ta zańsyz júrgen bir top Ózbekstan azamaty eline qaıtaryldy.

Byltyr Ózbekstan úkimeti deportatsııalanǵan eńbek mıgrattarynyń quqyǵy men olarǵa qatysty qoldanylatyn sharalar týraly qaýly shyǵardy. Oǵan saı, deportatsııalanǵan ózbekstandyq mıgranttar elge qaıtý shyǵynyn óz qaltasynan óteýge mindetteledi.