Byltyr Otan qorǵaýǵa attanǵan 1200-den astam sarbazdyń alǵashqy legi oraldy
ASTANA. KAZINFORM — Elordanyń temirjol vokzalynda áskerge baryp, merzimdi áskerı qyzmetin aıaqtap kelgen sarbazdardy saltanatty túrde qarsy alý jıyny ótti. Bul joly byltyr osy vokzaldan kóktemde attanyp, Almatydaǵy 61993 áskerı bólimde Otan aldyndaǵy boryshyn ótep kelgen 37 sarbazdy týystary men dostary jáne áskerı qorǵanys qyzmetiniń ókilderi qarsy aldy. Bul týraly elorda ákimdiginiń saıty jazdy.
Astana qalasy Qorǵanys isteri departamentiniń ókili, polkovnık Ǵanı Artyqov jas sarbazdardy sapqa turǵyzyp, olarǵa jáne ata-analaryna alǵys bildirdi.
— Er balalaryńyzdy osylaı myqty azamat etip tárbıelep, ósirip, áskerı boryshyn óteýge jibergenińizge alǵys aıtamyz. Bul balalar ótken jyly jas bozbala bolyp ketken edi, endi mine naǵyz saha sarbaz, kúshi myǵym Otan qorǵaýshy bolyp oraldy. Osyndaı shynyqqan, shymyr, erjúrek sarbazdarymyz barda atadan balaǵa mıras bolyp kele jatqan keń baıtaq jerimiz ben elimizdiń qaýipsizdigine nuqsan kelmeı, memleketimizdiń tynyshtyǵy men qorǵanys qabileti arta beredi, — dedi ol.
2025 jyly kóktemgi áskerge shaqyrý kezinde Astanadan 1200-den astam sarbaz Otan qorǵaýǵa attanǵan edi. Olardyń bıyl kóktemde aldyńǵy legi kelip te úlgerdi. Solardyń ornyna osy jyly elordadan 1440-tan astam jas azamat áskerge jóneltilýde. Osylaısha aǵalar ornyn iniler basyp, elimizdiń tynyshtyǵyn qorǵamaq.
— Nemerem Nurjan byltyr kóktemde desantshy bolyp áskerge Astanadan ketken bolatyn. Búgin mine, bir jyl ýaqyt zýlap óte shyqty, aman-esen boryshyn ótep, qaıta oralýda. Áskerde bolǵan ýaqytynda habarlasyp turdyq, eshqandaı qıyndyq bolmaǵanyn aıtty. Qolyna qarý ustap, shynyǵyp, naǵyz azamat bolyp oraldy. Tehnıkýmda oqyp jatqan edi, odan akademııalyq úzilis aldy, endi sony jalǵastyrady. 18 jasynda ketip, 19 jasta keldi. Ózim kezinde Túrikmenstanda 2 jyl áskerı boryshymdy ótegenmin. Ulym da áskerge barǵan. Sondyqtan týǵan Otandy qorǵaý — árbir er azamattyń abyroıly mindeti dep sanaımyn, — deıdi elordalyq aqsaqal Tólegen Juman.
Atalǵan áskerı bólimde Raıymbek batyr atyndaǵy arnaıy maqsattaǵy № 38 desanttyq shabýyldaý brıgadasynyń qatardaǵy jaýyngeri bolǵan Aıdos Jenalıev oqýyn támamdap, jumys istep júrgen kezinde óz erkimen áskerge barǵan.
– Ózim — Aqtóbeniń jigitimin. Jasym 24-te. Astanada joǵary bilim alyp, eńbek etemin. Byltyr áskerı boryshymdy óteý týraly sheshim qabyldap, Almaty qalasynda sol mindetimdi atqardym. Áskerde barlyq jaǵdaı jasalǵan. Oqys oqıǵa da, eskertýler de bolmaı, otbasymyzǵa aman-esen kelip jatyrmyz. Áskerge baryp, qarý ustaýdy úırený, áskerı tártipke baǵynyp, sarbaz bolý, sol arqyly Otanyńa qyzmet etý — árbir er azamattyń mindeti, keıingi inilerimdi osy mindetinen jaltarmaýǵa shaqyramyn. Bir jyl demde zýlap ótip ketedi, al sizdiń ómirbaıanyńyzda osyndaı boryshyńyzdy abyroımen atqarǵanyńyz erlik is bolyp qalady, — deıdi Aıdos.
Al bıyl Astanadan kóktemde 1400 ulan áskerge shaqyryldy.