Byltyr náreste ólim-jitimi 8,3%-ǵa tómendedi — DSM

ASTANA. KAZINFORM – Qazaqstandaǵy balalarǵa medıtsınalyq kómektiń sapasyn jaqsartý jónindegi keshendi sharalar 2024 jyly náreste óliminiń kórsetkishin 8,3%-ǵa tómendetýge múmkindik berdi, al neonataldyq ólimniń deńgeıi 19%-ǵa tómendegen. Bul týraly Densaýlyq saqtaý mınıstri Aqmaral Álnazarova vedomstvo alqasynyń keńeıtilgen otyrysynda aıtty. 

— Qazaqstan ortalyq Azııadaǵy reanımatsııa bólimshesindegi bir nárestege bir meıirger kútim jasaý kerek degen mańyzdy qaǵıdany neonataldyq kómek standartyna engizgen birinshi jáne jalǵyz el, — dedi A.Álnazarova.

Bala ólimi qurylymynda birinshi oryn alatyn týa bitken damý kemistikterin azaıtý maqsatynda elimizdiń 13 óńirinde 15 «Bir kúndik klınıka» quryldy, onda 50 myń júkti áıel zerttep-qaraýdan ótti. 

Nátıjesinde týa bitken aqaýlardyń erte anyqtalýy 10%-ǵa ósti. Alǵash ret uryqtyń patologııasyn az ınvazıvti ádisterdi qoldana otyryp, jatyrishilik emdeý úshin «Fetaldyq medıtsına» engizildi.

— Joǵaryda atalǵan is-sharalardyń barlyǵy 2024 jyldyń qorytyndysy boıynsha sábılerdiń ómir súrý deńgeıin 88%-dan 93%-ǵa deıin arttyrýǵa jáne TDK-den sábıler ólimin 15%-ǵa tómendetýge múmkindik berdi. Jyl sońyna deıin barlyq óńirlerde bir kúndik emhanalar qurýdy aıaqtaý qajet, — dep atap ótti vedomstvo basshysy óńirlik alqa qatysýshylaryna arnaǵan sózinde.

Eske sala keteıik, buǵan deıin Aqmaral Álnazarova elimizde júz adamǵa donorlyq júrek qoıylǵanyn aıtqanyn jazǵan bolatynbyz.