Byltyr memlekettik eńbek ınspektorlary 62,8 myń jumyskerdiń quqyǵyn qorǵady
ASTANA. KAZINFORM — 2025 jyly memlekettik eńbek ınspektorlary respýblıkanyń 629 kásipornynda 11,9 myńnan astam jumyskerge jalaqy boıynsha 3,1 mlrd teńgeden astam somaǵa bereshek baryn anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 8,7 myńnan astam faktisi anyqtaldy. Bul týraly vedomstvonyń baspasóz qyzmeti málim etti.
Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 4 245 uıǵarym berildi jáne 524,3 mln teńgeden astam somaǵa aıyppul salyndy.
— Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 11,8 myń jumyskerdiń quqyqtary qorǵaldy. Olarǵa 2,85 mlrd teńge tólendi, — delingen habarlamada.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.
2025 jyly memlekettik eńbek ınspektorlary 6 599 tekserý júrgizdi, onyń barysynda 8 720 buzýshylyq anyqtaldy, onyń ishinde: eńbek salasynda — 7 089; eńbek qaýipsizdigi jáne eńbekti qorǵaý boıynsha — 1 585; halyqty jumyspen qamtý boıynsha — 46.
Qabyldanǵan sharalardyń nátıjesinde 51 myń jumyskerdiń eńbek quqyǵy qorǵaldy.
Aıta keteıik, elektrondyq eńbek bırjasynda ótken jyly jumys kúshine suranys usynystan asyp tústi.